Jetısu oblysynda Halyqaralyq volonterler jyly aiasynda «ZHETISU VOLUNTEER: Bırlık. Izgılık. Äreket.» respublikalyq volonterler sletı ūiymdastyryldy. Auqymdy ıs-şaraǧa elımızdıŋ barlyq öŋırınen kelgen 70 volonter, jastar ūiymdarynyŋ jetekşılerı, volonterlık qozǧalys ökılderı men sala sarapşylary qatysty. Sletqa kelgen delegattar «Taza Qazaqstan» jalpyūlttyq baǧdarlamasy aiasynda Taldyqorǧanda aǧaş köşetterın otyrǧyzdy, sol siiaqty Tekelı qalasynda ūzyndyǧy şamamen 38 şaqyrym bolatyn Dınmūhamed Qonaev atyndaǧy köşenıŋ boiynda tazalyq jūmystaryn jürgızdı, - dep habarlaidy Jetısu oblysy äkımınıŋ baspasöz qyzmetı.
Oblystyq ışkı saiasat basqarmasy men «Jetisu jastary» KMM ūiymdastyrǧan respublikalyq slettıŋ basty maqsaty - elımızdegı volonterlık qozǧalysty damytu, öŋırler arasyndaǧy yntymaqtastyqty nyǧaitu, volonterlerdıŋ üzdık täjıribelerın ortaǧa salu jäne jastardy qoǧamdyq maŋyzy bar bastamalarǧa keŋınen tartu boldy.
Respublikalyq slettıŋ saltanatty aşyluynda «Ūlttyq volonterler jelısı» zaŋdy tūlǧalar bırlestıgınıŋ atqaruşy direktory, Ūlttyq volonterler front-ofisınıŋ basşysy Aibek Dosymbetov söz söilep, volonterlık qozǧalystyŋ qoǧamdaǧy maŋyzdylyǧyna toqtaldy. Onyŋ aituynşa, soŋǧy jyldary memlekettık deŋgeide volonterlık qyzmetke erekşe köŋıl bölınıp, azamattardyŋ qoǧamdyq ömırge belsendı aralasuyna keŋ mümkındıkter jasaluda.
– Eŋ aldymen barşaŋyzdy osy saltanatty ıs-şaranyŋ aşyluymen şyn jürekten qūttyqtaimyn! Soŋǧy jyldary memleket deŋgeiınde volonterlık qyzmetke erekşe köŋıl bölınude. 2020 jylmen jäne odan keiıngı kezeŋmen salystyrǧanda volonterler sany edäuır artty. Būl elge qyzmet etudı jürek qalauymen taŋdaityn jastardyŋ qatary köbeiıp kele jatqanyn körsetedı. Sonymen qatar volonterlık qyzmet alǧaş ret Konstitusiiamyzda körınıs tapty. Sondyqtan bız volonterlerdı qoǧamnyŋ damuyna serpın beretın qozǧauşy küşterdıŋ bırı dep sanaimyz, – dedı Aibek Dosymbetov.
Osy künı elımızdıŋ 20 öŋırınen kelgen delegattar 20 tüp aǧaş köşetın otyrǧyzdy. Sol siiaqty baǧdarlama aiasynda slettıŋ ekınşı künınde qatysuşylar Tekelı qalasynda ūzyndyǧy şamamen 38 şaqyrym bolatyn Dınmūhamed Qonaev atyndaǧy köşenıŋ boiyn tazalady.
Sonymen qatar slet aiasynda täjıribe almasu jäne volonterlık qyzmettıŋ özektı baǧyttaryn talqylauǧa arnalǧan interaktivtı sessiialar ūiymdastyryldy.
Volonterlık saladaǧy sarapşy, ädısker ärı trener Elena Amreeva volonterlık bastamalardy tiımdı ūiymdastyru, erıktılermen jūmys ısteu jäne qoǧamdyq jobalardyŋ nätijelılıgın arttyrudaǧy täjıribelerımen bölıstı.
Jastar arasynda tanymal bloger, motivasiialyq spiker Alpamys Jarylqasynov volonterlık qyzmettıŋ maŋyzy, jastardyŋ belsendılıgı jäne qoǧamǧa paidaly bastamalardy qoldau turaly oilaryn ortaǧa saldy.
İnteraktivtı kezdesuler barysynda qatysuşylar öz öŋırlerındegı tabysty täjıribelerımen bölısıp, jaŋa bastamalar men bırlesken jobalardy jüzege asyru mümkındıkterın talqylady. Slet baǧdarlamasy aiasynda qatysuşylarǧa arnaiy sertifikattar tabystaldy.
Atap ötsek, Jetısu oblysynda volonterlık qozǧalysty damytuǧa erekşe köŋıl bölınedı. Bügınde öŋırde 1 100-den astam volonter, 13 volonterlık ūiym jäne 18 bastamaşyl top qoǧam üşın maŋyzdy jobalardy jüzege asyruǧa atsalysuda. Olardyŋ qyzmetı ekologiialyq aksiialar ūiymdastyrudy, qarttar men äleumettık qoldaudy qajet etetın azamattarǧa kömek körsetudı, qaiyrymdylyq bastamalaryn ıske asyrudy, salauatty ömır saltyn nasihattaudy jäne jastardyŋ azamattyq belsendılıgın arttyru baǧyttarynda.
Öŋırdegı volonterlık qyzmettı üilestırude 2023 jyly qūrylǧan «Meiırımdı Jetısu» front-ofisı maŋyzdy röl atqardy.
Jyl basynan berı oblys volonterlerınıŋ qatysuymen mädeniet, bılım beru, ekologiia jäne densaulyq saqtau salalarynda 6 myŋnan astam aksiia ötkızıldı. Köpbalaly jäne az qamtylǧan otbasylarǧa, sondai-aq jalǧyzbasty qarttarǧa kömek körsetıldı. Atalǧan ıs-şaralarǧa 50 myŋǧa juyq erıktı qatysty.
Ekı künge sozylǧan «ZHETISU VOLUNTEER: Bırlık. Izgılık. Äreket» respublikalyq volonterler sletı elımızdıŋ är öŋırınen kelgen belsendı jastardy ortaq maqsat töŋıregınde bırıktırgen maŋyzdy alaŋǧa ainaldy. Slet barysynda qatysuşylar jaŋa täjıribe jinaqtap, öŋıraralyq ärıptestık bailanystaryn nyǧaitty jäne aldaǧy uaqytta bırlesken äleumettık ärı ekologiialyq jobalardy jüzege asyruǧa baǧyttalǧan bastamalardy talqylady.
Volonterlerdıŋ halyqaralyq jyly aiasynda ūiymdastyrylǧan respublikalyq slet Jetısu oblysynda volonterlık qozǧalysty odan ärı damytuǧa, jastardyŋ qoǧamdyq ömırge belsendı aralasuyna jäne volonterlık mädeniettı keŋınen nasihattauǧa tyŋ serpın berdı.
