پاۆلودار وبلىسىنىڭ پوليتسيا دەپارتامەنتى ۋاقىتشا اكىمشىلىك قاماۋعا الىنعان ازاماتتاردى تاماقتاندىرۋعا 22 444 671 تەڭگە قارجى ءبولدى، دەپ حابارلايدى ادىرنا ۇلتتىق پورتالى satypalu.gov.kz سايتىنا سىلتەمە جاساپ.
پاۆلودار وبلىسىنىڭ پوليتسيا دەپارتامەنتى "ىستىق تاماقتى ۇيىمداستىرۋ بويىنشا قىزمەتتەردى ساتىپ الۋ" دەگەن تاقىرىپپەن جاريالاعان تەندەرگە وتىنىمدەردى قابىلداۋ 19 تامىز كۇنى باستالىپ، جەڭىمپاز كومپانيا 3 قىركۇيەك كۇنى انىقتالادى. مەملەكەتتىك ساتىپ الۋ ءۇش لوتتان تۇرادى. تەندەر جەتكىزۋشى ءۇش لوتتان تۇراتىن تاپسىرىستى ورىنداۋى ءۇشىن 12 اي بويى كۇنىنە ءۇش ۋاقىت (تاڭعى اس 07-00 مينۋتتان 08-00 مينۋتقا دەيىن; تۇسكى اس 12-00 مينۋتتان 13-00 مينۋتقا دەيىن; كەستەگە سايكەس كەشكى اس 18-00 مينۋتتان 19-00 مينۋتقا دەيىن) تاماق جەتكىزىپ تۇرۋى كەرەك. تاپسىرىستى ورىنداۋ ۋاقىتى 2024 جىل دەپ انىق كورسەتىلگەن. دەمەك تەندەر جەڭىمپازى 12 ايلىق جۇمىستى ءتورت-اق اي اتقارادى دەگەن ءسوز.
تەحنيكالىق سيپاتتامادا ءبىر ادامعا ارنالعان تاماقتىڭ قۇنى تاۋلىگىنە 2100 تەڭگەدەن اسپاۋ كەرەكتىگى دە ايتىلعان. بىراق، ناقتى قانشا ادامنىڭ تاماقتاناتىنى كورسەتىلمەگەن.
ءبىزدى مىنا سۇراقتار مازالايدى. "جىل باسىندا ءوتۋى ءتيىس تەندەر نەگە ەندى عانا جاريالانىپ وتىر؟", "ۋاقىتشا اكىمشىلىك قاماۋعا الىنعان ازاماتتار ون ەكى ايعا بولىنگەن تاماقتى ءتورت ايدا جەپ تاۋىسا الا ما؟".
22 444 671 تەڭگەنى 2100 تەڭگەگە (كۇندىك تاماققا) بولسەك، 10 687 ادامنىڭ قارجىسى شىعادى. پاۆلودار وبلىسىنىڭ پوليتسيا دەپارتامەنتىنە قاراستى ءۇش مەكەمە الداعى ءتورت ايدا ون مىڭنان استام ازاماتتى ۋاقىتشا قاماۋعا الۋى مۇمكىن بە؟
بۇل سۇراقتاردى ءتيىستى مەكەمەگە جولدادىق. ولاردان جەتكەن جاۋاپتى الدا جاريالايتىن بولامىز.
اسىل اباي
ادىرنا ۇلتتىق پورتالى
