ادىرنا ۇلتتىق پورتالىندا «پاۆلودار وبلىسى 135 171 812 تەڭگەگە 2 162 749 دانا قاراعاي كوشەتىن ساتىپ الماق» (سىلتەمە: https://adyrna.kz/post/178798 ) دەگەن تاقىرىپپەن ماتەريال جاريالانعان ەدى. سول ماقالاعا قاتىستى تۋىنداعان سۇراقتارعا پاۆلودار وبلىسىنىڭ جەر قويناۋىن پايدالانۋ، قورشاعان ورتا جانە سۋ رەسۋرستارى باسقارما باسشىسىنىڭ ورىنباسارى س. تولەۋتاەۆ جاۋاپ بەردى، - دەپ حابارلايدى ادىرنا ۇلتتىق پورتالى.
ادىرنا: پاۆلودار وبلىسىنىڭ مەملەكەتتىك ساتىپ الۋ باسقارماسى قاراعاي كوشەتتەرىنىڭ ءار داناسىن 62,5 تەڭگەگە قانداي نەگىزگە سۇيەنىپ باعالاپ وتىر؟
باسقارما: اعاش ەكپەلەرىن كونكۋرسقا شىعارار الدىندا، ءاربىر اعاش ەكپەلەرىن وسىرەتىن ۇيىمداردان كوممەرتسيالىق ۇسىنىستار الىنادى. اعىمداعى جىلى كادىمگى قاراعاي كوشەتىنىڭ ءبىر بىرلىگىنىڭ ققس ەسەپتەمەگەندەگى باعاسى 62,5 تەڭگە، ققس ەسەپتەگەندە ءبىر بىرلىكتىڭ باعاسى 70 تەڭگەنى قۇرادى.
ادىرنا: كورسەتىلگەن اۋماققا 2 162 749 كوشەت ەگىلگەنىن قالاي باقىلايدى؟ ونى باقىلاۋ ءۇشىن ارنايى كوميسسيا قۇرىلعان با؟
باسقارما: ورمان داقىلدارىن تەحنيكالىق قابىلداۋدى وتكىزۋ جۇمىستارى قازاقستان رەسپۋبليكاسى اۋىل شارۋاشىلىعى ءمينيسترىنىڭ (2014 جىلعى 22 جەلتوقسانداعى № 18-02/681) «ورمانداردى مولىقتىرۋ مەن ورمان ءوسىرۋ جانە ولاردىڭ ساپاسىنا باقىلاۋ جاساۋ قاعيدالارىن بەكىتۋ تۋرالى» بۇيرىعىنا جانە «قازاقستان ورمانشىسىنىڭ انىقتامالىعى، استانا 2012 ج.» انىقتامالىعىنا سايكەس جۇرگىزىلەدى. جوعارىدا اتالعان بۇيرىق پەن انىقتامانىڭ نەگىزىندە كوميسسيا قۇرىلادى جانە كوشەتتەر ەگىلگەن اۋماقتاردا تەحنيكالىق قابىلداۋ جانە باقىلاۋ جۇمىستارى جۇرگىزىلەدى.
ادىرنا: كوشەتتەردىڭ ءونىپ، جەرسىنىپ كەتۋىنە كىم كەپىلدىك بەرەدى؟
باسقارما: مەملەكەتتىك ورمان قورى اۋماعىندا ورمان داقىلدارىن وتىرعىزۋدى مەكەمەنىڭ ورمان كۇزەتى قىزمەتكەرلەرىنىڭ كۇشىمەن جۇرگىزەدى. مەملەكەتتىك مەكەمەلەر ورمان داقىلدارىنىڭ ءومىر سۇرۋىنە جاۋاپ بەرەدى. الايدا، ايتا كەتەتىن جاعداي، ەكپە اعاشتاردىڭ جەرسىنۋىنە ەڭ باستى اسەر ەتەتىن فاكتور ول اۋا-رايىنىڭ قولايلى بولۋى. اعىمداعى جىلى اۋا-رايىنىڭ قاتتى ىستىق جانە جاۋىن-شاشىننىڭ بولماۋىنا بايلانىستى وتىرعىزىلعان جاس ەكپە اعاشتارىنىڭ جەرسىنۋى ەداۋىر قيىنعا ءتۇستى.
ادىرنا: 2 ميلليوننان استام كوشەتتەردىڭ تولىقتاي ەگىلگەنىن قالاي دالەلدەيسىزدەر؟
باسقارما: تەحنيكالىق قابىلداۋ اكتىلەرىنىڭ نەگىزىندە بارلىق ورمانشىلىق بويىنشا جيىنتىق ۆەدوموست ەكى دانادا جاسالادى، ولاردىڭ بىرەۋى مەملەكەتتىك مەكەمەنىڭ كوميسسياسىنا جىبەرىلەدى، ال ەكىنشىسى جوبالارمەن جانە اكتىلەرمەن بىرگە ورمانشىلىق ىستەرىندە ساقتالادى.
مەملەكەتتىك مەكەمە كوميسسياسىنىڭ ورمانشىلىقتىڭ كىشى كوميسسيالارى ۇسىنعان ماتەريالداردىڭ دۇرىستىعىن ورمانشىلىق بويىنشا جۇمىستاردىڭ جالپى كولەمىنىڭ كەمىندە 5% تەكسەرۋگە قۇقىعى بار. بۇدان ءارى كوميسسيا ورمانشىلىقتان تۇسكەن بارلىق ماتەريالداردى جيناقتايدى، تەحنيكالىق قابىلداۋ قورىتىندىسى بويىنشا شەشىم شىعارادى.
كوميسسيا شەشىمىنىڭ حاتتامالارىن مەملەكەتتىك مەكەمەنىڭ باسشىسى بەكىتەدى، ودان كەيىن جالپى مەملەكەتتىك مەكەمە بويىنشا ورمان ەكپەلەرىن تەحنيكالىق قابىلداۋدىڭ جيىنتىق ۆەدوموسى جاسالادى. ەكپەلەردى تەحنيكالىق قابىلداۋ اكتىلەرى ولاردى ورمان ەكپەلەرىن ەسەپكە الۋ كىتابىنا ەنگىزۋ ءۇشىن نەگىز بولىپ تابىلادى.
سونىمەن قاتار، اتالعان ءىس-شارالار قازاقستان رەسپۋبليكاسىنىڭ (2003 جىلعى 8 شىلدەدەگى N 477) ورمان كودەكسىنىڭ 5 تارماعىنىڭ 13 بابىنا سايكەس ۋاكىلەتتى ورگان قۇزىرەتىنە، سونداي-اق «پاۆلودار وبلىسى ورمان جانە جانۋارلار دۇنيەسىن قورعاۋ ينسپەكتسياسى» رمم-ءى، ورمان قورىنىڭ جاي-كۇيiنە، كۇزەتiلۋiنە، قورعالۋىنا، پايدالانىلۋىنا، ورمانداردىڭ مولىقتىرىلۋى مەن ورمان وسiرۋگە مەملەكەتتىك باقىلاۋ مەن قاداعالاۋدى تەكسەرۋلەر ارقىلى جۇزەگە اسىرادى.
قانات بىرلىكۇلى،
“ادىرنا” ۇلتتىق پورتالى
