فوتو: report.az
باكۋدە تۇركى الەمى كومپوزيتورلارى وداعىنىڭ (Turkic Union of Composers — TUC) العاشقى سەزى ءوتتى. جيىن بارىسىندا ازەربايجان، قازاقستان، قىرعىزستان، تۇركيا، وزبەكستان، تۇركىمەنستان جانە ۆەنگريانىڭ جەتەكشى مۋزىكالىق ۇيىمدارىنىڭ وكىلدەرى جاڭا حالىقارالىق شىعارماشىلىق بىرلەستىك قۇرۋ تۋرالى كەلىسىمگە كەلدى. بۇل تۋرالى Report.az جازدى، دەپ حابارلايدى "ادىرنا".
سەزد اياسىندا تاراپتار باكۋ دەكلاراتسياسىنا قول قويدى. قۇجات تۇركى ەلدەرىنىڭ كومپوزيتورلارى، مۋزىكاتانۋشىلارى، كونسەرۆاتوريالارى، مۋزىكالىق اكادەميالارى مەن شىعارماشىلىق وداقتارى اراسىنداعى تۇراقتى كاسىبي ىنتىماقتاستىقتى دامىتۋعا باعىتتالعان.
جاڭا وداقتىڭ قۇرىلۋى تۇركى مەملەكەتتەرىندەگى كومپوزيتورلار اراسىنداعى بايلانىستى ءبىر ارناعا توعىستىرىپ، حالىقارالىق دەڭگەيدەگى تۇراقتى كاسىبي ارىپتەستىككە جول اشپاق. TUC اياسىندا شىعارماشىلىق تاجىريبە الماسۋ، مۋزىكالىق زەرتتەۋلەردى دامىتۋ جانە كاسىبي بايلانىستاردى نىعايتۋ باعىتىنداعى جۇمىستاردى جۇيەلەۋ كوزدەلەدى.
تۇركى الەمى كومپوزيتورلارى وداعىنىڭ ازەربايجاندا قۇرىلۋىنىڭ دا وزىندىك سيمۆولدىق ءمانى بار. بۇل ەل الەمدىك مۋزىكا مادەنيەتىنە كورنەكتى كومپوزيتورلار ۋزەير گادجيبەيلي، گارا گاراەۆ، فيكرەت اميروۆ سەكىلدى تۇلعالاردى سىيلاعان جانە باي مۋزىكالىق داستۇرىمەن ەرەكشەلەنەدى.
جاڭا ۇيىم تۇركى حالىقتارىنىڭ مۋزىكالىق مۇراسىن ناسيحاتتاۋ مەن قازىرگى كومپوزيتورلىق ونەردى دامىتۋعا باعىتتالعان حالىقارالىق كاسىبي الاڭ رەتىندە قالىپتاسۋى مۇمكىن.
