ارمەنيا مەن ازەربايجان بەيبىتشىلىك ورناتۋ جانە مەملەكەتارالىق قاتىناستاردى قالىپتاستىرۋ جونىندەگى الدىن الا كەلىسىلگەن كەلىسىم ءماتىنىن جاريالادى، دەپ حابارلايدى "ادىرنا" ۇلتتىق پورتالى.
قۇجاتتا ەكى ەل ءبىر-ءبىرىنىڭ ەگەمەندىگى مەن اۋماقتىق تۇتاستىعىن مويىندايتىنىن، كەز كەلگەن اۋماقتىق تالاپتاردان باس تارتاتىنىن جانە كورشى مەملەكەتتىڭ ىشكى ىسىنە ارالاسپاۋعا مىندەتتەلەتىنى ايتىلعان.
تاراپتار كۇش قولدانباۋعا، ورتاق شەكارا بويىندا ءۇشىنشى ەلدەردىڭ اسكەري كۇشتەرىن ورنالاستىرماۋعا، سەنىم مەن قاۋىپسىزدىك شارالارىن ەنگىزۋگە كەلىستى. سونىمەن قاتار، شەكارانىڭ دەليميتاتسياسى مەن دەماركاتسياسى جۇرگىزىلىپ، ديپلوماتيالىق قاتىناستار ورناتىلادى.
كەلىسىم ەكونوميكالىق، كولىك، ەكولوگيالىق، گۋمانيتارلىق جانە مادەني ىنتىماقتاستىقتى كوزدەيدى. سونداي-اق، قاقتىعىس كەزىندە ءىز-ءتۇزسىز جوعالعانداردى ىزدەۋ جانە قازا تاپقانداردىڭ سۇيەكتەرىن قايتارۋ جۇمىستارى جۇرگىزىلەدى. بۇرىنعى بارلىق ءوزارا شاعىمدار حالىقارالىق ينستانتسيالاردان قايتارىلادى.
كەلىسىمنىڭ ورىندالۋىن ەكىجاقتى كوميسسيا باقىلايدى، ال تۋىنداعان داۋلار بەيبىت جولمەن شەشىلەدى. قۇجات ازەربايجان، ارميان جانە اعىلشىن تىلدەرىندە دايىندالعان، ال داۋلى جاعدايدا اعىلشىن تىلىندەگى نۇسقا باسشىلىققا الىنادى.
