ۋكراينادا سوعىس قيمىلدارىنا قاتىسىپ جۇرگەن ازەربايجان ازاماتتارى ءومىر بويىنا باس بوستاندىعىنان ايىرىلۋى مۇمكىن. مۇنداي ەسكەرتۋدى ەلدىڭ باس پروكۋراتۋراسى جاسادى، دەپ حابارلايدى «ادىرنا» ءتىلشىسى.
29 جەلتوقساندا جاريالانعان حابارلامادا كەيبىر ازەربايجاندىقتىڭ رەسەي مەن ۋكراينا اراسىنداعى سوعىس قيمىلدارىنا، سونداي-اق وزگە دە قارۋلى قاقتىعىستارعا قاتىسىپ جۇرگەنى ايتىلعان. باس پروكۋراتۋرانىڭ مالىمەتىنشە، ازەربايجان زاڭناماسىنا سايكەس، ۋكرايناداعى سوعىسقا قاي تاراپتا بولماسىن قاتىسۋ — قىلمىس بولىپ سانالادى جانە ول ءۇشىن ءومىر بويىنا تۇرمەگە قاماۋ جازاسى كوزدەلگەن.
«رەسەي مەن ۋكراينا اراسىنداعى اسكەري وپەراتسيالارعا قاتىسقان كەيبىر ازاماتتارىمىزدىڭ قازا تاپقانى، اۋىر جارالانعانى نەمەسە تۇتقىنعا تۇسكەنى تۋرالى اقپاراتتار ءبىزدى الاڭداتادى»، — دەلىنگەن حابارلامادا.
باس پروكۋراتۋرا ازەربايجان قىلمىستىق كودەكسىندەگى «جالدامالىلىق» تۋرالى باپتى ەسكە سالدى. بۇل باپ بويىنشا جازا 8 جىلعا باس بوستاندىعىنان ايىرۋدان باستاپ ءومىر بويىنا تۇرمەگە قاماۋعا دەيىن جەتۋى مۇمكىن. قازىرگى تاڭدا وسى باپ اياسىندا بىرقاتار ازاماتقا قاتىستى قىلمىستىق ىستەر قوزعالىپ، تەرگەۋ جۇرگىزىلىپ جاتىر. الايدا ولاردىڭ ناقتى ۋكراينادا سوعىسقانى نەمەسە سانى قانشا ەكەنى ناقتىلانبادى.
ۆەدومستۆو ازاماتتاردى زاڭسىز ۇندەۋلەرگە ەرمەۋگە، قىراعىلىق ساقتاۋعا جانە مەملەكەت زاڭدارىن قۇرمەتتەۋگە شاقىردى.
ەسكە سالايىق، 2023 جىلدىڭ مامىر ايىندا باكۋدەگى ۋكراينا ەلشىلىگىنىڭ قورشاۋىندا ۋكراينا قارۋلى كۇشتەرى جاعىندا سوعىسىپ قازا تاپقان ازەربايجان ازاماتتارىنا ارنالعان «ەستەلىك قابىرعاسى» اشىلعان. وندا 26 ادامنىڭ ەسىمى جازىلعان.
ال 2025 جىلدىڭ ساۋىرىندە Media.az پورتالى ۋكراينادا سوعىس بارىسىندا ەكى ازەربايجان ازاماتى — سانان موحسۋموۆ پەن گۋسەين يساەۆتىڭ مايداننىڭ ەكى جاعىندا قازا تاپقانىن جازعان.
