باكۋدە ءوتىپ جاتقان الەم چەمپيوناتىندا قازاقستاندىقتار ەكى التىن مەدال جەڭىپ الدى، دەپ حابارلايدى “ادىرنا” ۇلتتىق پورتالى.
17 جاسقا دەيىنگى سپورتشىلار اراسىنداعى كۇرەستەن 48 كەلىگە دەيىنگى سالماق دارەجەسىندە سىنعا تۇسكەن باقداۋلەت اعابەك الەم چەمپيونى اتاندى. فينالدا ول ءۇندىستان وكىلى ااريان اارياندى 10:0 ەسەبىمەن ايقىن باسىمدىقپەن جەڭدى.
تۋرنير بارىسىندا قازاقستاندىق بالۋان بەس بەلدەسۋ وتكىزىپ، تاجىكستان، بولگاريا، موڭعوليا جانە وزبەكستان سپورتشىلارىن جەڭدى. اسىرەسە موڭعوليالىق قارسىلاسىن نەبارى 36 سەكۋندتا ۇتىپ، جارتىلاي فينالدا ازيا چەمپيونى فارۋح ماحمۋدوۆتى 7:3 ەسەبىمەن تىزە بۇكتىردى. جارىس بويى باقداۋلەت قارسىلاستارىنا نەبارى ءۇش ۇپاي عانا بەرىپ، ءوزى 47 ۇپاي جينادى.
قازاقستان قورجىنىنا ەكىنشى التىن جۇلدەنى گرەك-ريم كۇرەسىنىڭ 55 كەلىگە دەيىنگى سالماق دارەجەسىندە ونەر كورسەتكەن ديار ءامانالى سالدى. ول جارىس بارىسىندا گرەكيا، رەسەي، گرۋزيا جانە بولگاريا بالۋاندارىن جەڭىپ، فينالدا ۆەنگريا وكىلى كەۆە كوۆاچپەن كەزدەستى.
شەشۋشى بەلدەسۋ 1:1 ەسەبىمەن اياقتالعانىمەن، العاشقى ناتيجەلى ۇپايدى ديار ەنشىلەگەندىكتەن، جەڭىس قازاقستاندىق سپورتشىعا بەرىلدى.
وسىلايشا، قازاقستان قۇراماسى 17 جاسقا دەيىنگى سپورتشىلار اراسىنداعى الەم چەمپيوناتىن ەكى التىن مەدالمەن تولىقتىردى.
