بۇگىن، 25 قاراشا — تۇركى جازبا ءتىلىن جاڭعىرتۋ كۇنى. مەرەكە 2019 جىلدان بەرى تويلانىپ كەلەدى، دەپ حابارلايدى «ادىرنا» ءتىلشىسى.
وسىدان 131 جىل بۇرىن دانيالىق لينگۆيست ۆيلگەلم تومسەن العاش رەت كونە تۇركى جازۋىنىڭ كىلتىن تاۋىپ، عىلىم الەمىندە ايرىقشا جاڭالىق اشقان ەدى.
عالىمنىڭ 200 جىل بويى سىرىن اشپاي كەلە جاتقان كونە ەسكەرتكىشتەن ەڭ الدىمەن وقىعان سوزدەرى «ءتاڭىرى» جانە «تۇرىك» دەگەن سوزدەر بولاتىن. وسى كەزدەن باستاپ تۇركولوگيا تاريحىنىڭ جاڭا تاراۋى باستالدى. كەزدەيسوق تۇردە اشىلعان بۇل ەكى عانا ءسوز بۇتىندەي ءبىر كونە ءداۋىردىڭ قۇپيا قۇپياسىن اشۋعا جول اشتى. ۋاقىت وتە كەلە وعان حح عاسىردا تۇركى ەلدەرىنىڭ عالىمدارى – تۇرىك، قازاق، ازەربايجان، وزبەك جانە باسقا دا زەرتتەۋشىلەرى قوسىلدى.
قازىر ەۋرازيا كولەمىندە تۇرىك بىتىكپەن بادىزدەلىپ ورنەكتەلگەن 700-دەن استام ءىرىلى-كىشىلى بىتىكتاس، ەسكەرتكىشتەر، جارتاستاعى جانە ءتۇرلى زات-بۇيىمدارداعى ماتىندەر تىركەلىپ وتىر.
قازىرگى تاڭدا حالىقارالىق تۇركى اكادەمياسىندا كونە تۇركى جازۋىن زەرتتەپ، اۋدارۋمەن اينالىساتىن «تۇركولوگيا، التايستيكا جانە موڭعولتانۋ» ءبولىمى قىزمەت ىستەيدى. سونىمەن قاتار اكادەميا تاراپىنان تۇركولوگياعا ەلەۋلى ۇلەس قوسقان زەرتتەۋشىلەرگە ارنالعان، «ۆيلگەلم تومسەن» اتىنداعى مەدال شىعارىلعان.
