تۇركسوي حالىقارالىق مادەني ۇيىمى وزبەكستانداعى يسلام وركەنيەتى ورتالىعى مۋزەيىن «تۇركى الەمىنىڭ ۇزدىك مۋزەيى» دەپ تانىدى. بۇل تۋرالى ورتالىقتىڭ ءباسپاسوز قىزمەتى مالىمدەدى، دەپ حابارلايدى "ادىرنا".
ءتيىستى سەرتيفيكاتتى ورتالىق باسشىلىعىنا تۇركسوي-دىڭ باس حاتشىسى سۇلتان راەۆ تابىستادى.
ونىڭ ايتۋىنشا، ۇيىم اتىنان ءۇش سەرتيفيكات بەرىلگەن. العاشقىسى - وزبەكستان پرەزيدەنتى شاۆكات ميرزيوەۆ باستاماسىمەن جارىق كورگەن «تۇركى الەمى ادەبيەتىنىڭ ءىنجۋ-مارجاندارى» اتتى 100 تومدىق كىتاپ باسىلىمىنا تابىستالدى. مۇنداي اۋقىمدى جوبا بۇعان دەيىن تۇركى الەمىندە جۇزەگە اسىرىلماعانى اتاپ ءوتىلدى. قازىرگى ۋاقىتتا قازاقستان، ازەربايجان جانە قىرعىزستان بۇل باستامانى قولداپ، 20, 30, 40 جانە 50 تومدىق جوبالاردى ىسكە اسىرۋدا. جيناق «الەمدەگى ۇزدىك ادەبي جوبا» نوميناتسياسى بويىنشا سەرتيفيكاتقا يە بولدى.
ەكىنشى سەرتيفيكات «تۇركى الەمىنىڭ ۇزدىك مۋزەيى» نوميناتسياسى بويىنشا يسلام وركەنيەتى ورتالىعىنا تابىستالدى. سونىمەن قاتار مۋزەي تۇركسوي-دىڭ تۇركى الەمى مۋزەيلەرى قاۋىمداستىعىنا قابىلداندى.
سالتاناتتى ءراسىم تاشكەنت قالاسىندا وتكەن حالىقارالىق فورۋم اياسىندا ۇيىمداستىرىلدى. ۇيىم وكىلدەرى بۇل شەشىم ورتالىقتىڭ قىسقا مەرزىمدە اتقارعان اۋقىمدى جۇمىسىنا بەرىلگەن جوعارى باعا ەكەنىن اتاپ ءوتتى.
فورۋمعا تۇركيا، فرانتسيا، يتاليا، گەرمانيا، اقش، ۇلىبريتانيا، رەسەي، قىتاي، ءۇندىستان، يران جانە قازاقستان ەلدەرىنەن عالىمدار قاتىستى. جيىندا تەمىر اۋلەتى ءداۋىرىنىڭ تاريحى، ساياسي جۇيەسى، قالا قۇرىلىسى داستۇرلەرى، سونداي-اق عىلىم مەن مادەنيەتتىڭ دامۋى تالقىلاندى.
وزبەكستانداعى يسلام وركەنيەتى ورتالىعىنىڭ ديرەكتورى فيرداۆس ابدۋحاليكوۆ تۇركسوي تاراپىنان بەرىلگەن بۇل ماراپاتتى ورتالىق جۇمىسىنا كورسەتىلگەن جوعارى باعا دەپ اتادى.
ونىڭ ايتۋىنشا، تۇركسوي - ورتالىقتىڭ سەنىمدى ءارى تۇراقتى سەرىكتەستەرىنىڭ ءبىرى. بيىل بىرلەسكەن ءىس-شارالار وتكىزۋ جونىندە كەلىسىمدەر جاسالعان. ولاردىڭ قاتارىندا حالىقارالىق جاستار فورۋمى مەن تۇركى مەملەكەتتەرىنىڭ قولونەرشىلەر فەستيۆالى بار.
فورۋم قاتىسۋشىلارى تەمىر اۋلەتىنىڭ مۇراسى ەۋروپا مەن ازيا اراسىنداعى مادەني بايلانىستاردىڭ دامۋىنا زور ۇلەس قوسقانىن اتاپ ءوتىپ، حالىقارالىق عىلىمي ىنتىماقتاستىقتىڭ ماڭىزىن ەرەكشە ايتتى.
يسلام وركەنيەتى ورتالىعى وزبەكستان استاناسىندا، حاست-يمام كەشەنى ماڭىندا سالىنعان. عيمارات ورتاعاسىرلىق ساۋلەت ەسكەرتكىشتەرى ستيلىندە بوي كوتەرگەن: بيىكتىگى 34 مەتر بولاتىن ءتورت پورتال جانە 65 مەترلىك ورتالىق كۇمبەزى بار. ورتالىقتا قۇران زالى، 460 ورىندىق كونفەرەنتس-زال جانە وزبەكستان تاريحىن يسلامعا دەيىنگى كەزەڭنەن بۇگىنگە دەيىن قامتيتىن مۋزەي ەكسپوزيتسياسى قاراستىرىلعان.
ورتالىق اتا-بابا مۇراسىن زەرتتەۋ مەن ونى زاماناۋي تۇرعىدا زەردەلەۋگە ارنالعان الاڭعا اينالۋدى ماقسات ەتەدى. بۇل باعىتتا ول وزبەكستان حالىقارالىق يسلام اكادەمياسىمەن جانە الەمدەگى عىلىمي-اعارتۋشىلىق ورتالىقتارمەن بىرلەسىپ جۇمىس ىستەيدى.
