قاراعاندى وبلىسىنىڭ تۇرعىندارى "تازا قازاقستان" رەسپۋبليكالىق ەكولوگيالىق اكتسياسىن بەلسەندى قولداپ جاتىر. شاحتينسك قالاسىندا اۆتوموبيل جولىنىڭ بويىنداعى ورمان بەلدەۋى رەتكە كەلتىرىلدى.
"تازا ورمان" اكتسياسىنا ەرىكتىلەر، سپورتشىلار، "جاسىل ەل"جاساعى قاتىستى.
شاحتينسك ورمان القابىنىڭ اۋدانى – 722 گەكتار. بۇل قالا تۇرعىندارىنىڭ دەمالۋعا جانە سپورتپەن شۇعىلدانۋعا ارنالعان سۇيىكتى ورنى. دەگەنمەن، وزىنەن سوڭ قوقىستى تازالاپ جۇرۋگە ەكىنىڭ ءبىرى دايىن ەمەس. قالا جانە وعان ىرگەلەس كەنتتەر جاستارىنىڭ باستاماسىمەن ورماندى تازارتۋ جانە اعاش ەگۋ بويىنشا تۇراقتى اكتسيالار وتكىزىلەدى.
– ورمان – كەز كەلگەن ءوڭىردىڭ، قالانىڭ حالقى ءۇشىن قولايلى ورتانىڭ نەگىزگى قۇرامداس بولىكتەرىنىڭ ءبىرى. بۇگىنگى تاڭدا ءبىزدىڭ مىندەتىمىز – تۇرعىنداردىڭ تابيعاتقا قاتىستى دۇرىس ويلاۋى مەن مىنەز-قۇلقىن قالىپتاستىرۋ، پراكتيكالىق داعدىلاردى يگەرۋگە مۇمكىندىك بەرۋ، – دەيدى شاحتينسك قالاسىنىڭ جاستار رەسۋرستىق ورتالىعى باسشىسىنىڭ م. ا. الەكسەي ۆارزاەۆ.
شاحتينسك قالاسىندا "تازا قازاقستان" اكتسياسى باستالعاننان بەرى 100-دەن استام ەڭبەك ۇجىمى مەن 10 مىڭعا جۋىق تۇرعىن قاتىستى. وسى ۋاقىت ىشىندە 15 مىڭ توننادان استام قالدىقتار شىعارىلدى، ساياباق، الاڭ، ەسكەرتكىشتەر اۋماعى تازارتىلدى، مىڭنان استام كوشەت ەگىلدى.
