الەۋمەتتىك جەلىلەردە پاۆلودار قالاسى جاڭا جىلدىق بەزەندىرۋگە 791,9 ملن تەڭگە ءبولۋدى جوسپارلاپ وتىر دەگەن اقپارات تارادى، دەپ حابارلايدى "ادىرنا" ۇلتتىق پورتالى قازاقپاراتقا سىلتەپ.
جەلى قولدانۋشىلارى بۇل سومانىڭ تىم جوعارى ەكەنىن ايتىپ، قارجىنى الەۋمەتتىك ماسەلەلەرگە باعىتتاۋ قاجەت دەگەن پىكىر ءبىلدىردى.
جاريالانعان دەرەكتەرگە سايكەس، مەملەكەتتىك ساتىپ الۋلار پورتالىندا مەرەكەگە دايىندىق جانە قالانى بەزەندىرۋگە قاتىستى 3 لوت ورنالاستىرىلعان. ونىڭ ەڭ ۇلكەنى — 446,4 ملن تەڭگە، قالعاندارى — 236,6 ملن جانە 108,9 ملن تەڭگە. قۇجاتتامادا قاراجات مەرەكەلىك كونسترۋكتسيالاردى ورناتۋ، قىزمەت كورسەتۋ، تاسىمالداۋ، سونداي-اق ارنايى تەحنيكانى تارتۋ ءۇشىن جۇمسالادى دەپ كورسەتىلگەن.
الايدا پاۆلودار قالاسى اكىمدىگى بۇل سومالاردىڭ جاڭا جىلدىق بەزەندىرۋگە قاتىسى جوق ەكەنىن مالىمدەدى.
پاۆلودار اكىمىنىڭ ءباسپاسوز قىزمەتى تۇسىندىرگەندەي، اتالعان لوتتار جالپى قالالىق سەنبىلىكتەردى ۇيىمداستىرۋعا، سانيتارلىق تازالىق جۇمىستارىن جۇرگىزۋگە، ماتەريالدار مەن جۇكتەمەلەردى تاسىمالداۋعا جانە الەۋمەتتىك نىساندارعا (مەكتەپ، اۋرۋحانا) تەحنيكا ءبولۋ، باۋ-باقشا اۋماقتارىنان قوقىس شىعارۋعا ارنالعان ارنايى تەحنيكانى پايدالانۋدى قامتيدى.
«تەحنيكا تەك پاۆلوداردا شارۋاشىلىق جانە ۇيىمداستىرۋ جۇمىستارى ءۇشىن پايدالانىلادى. بۇل قىزمەتتەر جاڭا جىلدىق بەزەندىرۋدى قامتىمايدى»، — دەپ حابارلادى اكىمدىك وكىلدەرى.
سونداي-اق، اكىمدىك بيىلعى جاڭا جىلدى بەزەندىرۋگە بولىنەتىن ناقتى قاراجات – 23 ملن تەڭگە، ياعني بىلتىرعى 190 ملن تەڭگەدەن سەگىز ەسە از ەكەنىن اتاپ ءوتتى.
