بۇگىن اقمولا وبلىسىنىڭ بۋراباي مەملەكەتتىك ۇلتتىق تابيعي پاركىندە جانە زەرەندى اۋدانىندا «تازا قازاقستان» ەكولوگيالىق باستاماسى اياسىندا اكتسيالار ءوتتى. بۋرابايدا رەسپۋبليكالىق «مادەني مۇرانى بىرگە ساقتايىق» اكتسياسى، ال زەرەندى اۋدانىندا «يگى ىستەر كۇنى» ۇيىمداستىرىلدى.
بۋراباي مەملەكەتتىك ۇلتتىق تابيعي پاركىندە رەسپۋبليكالىق اكتسياعا قاتىسۋشىلار ۇلكەن شاباقتى كولىنىڭ ماڭىنداعى اۋماقتى تازالادى. ءىس-شارا مادەنيەت جانە اقپارات مينيسترلىگىنىڭ، ازاماتتىق باستامالاردى قولداۋ ورتالىعىنىڭ جانە قازاقستاننىڭ ازاماتتىق اليانسىنىڭ قولداۋىمەن ءوتتى.
اكتسياعا ۆولونتەرلەر، ەكولوگيالىق ينفليۋەنسەرلەر، ازاماتتىق قوعام وكىلدەرى، «MADENI MURA» كلۋبىنىڭ مۇشەلەرى، سونداي-اق بۋراباي اۋدانىنىڭ «جاسىل ەل» ەڭبەك جاساعى مەن رەسپۋبليكالىق «جاسىل ەل» شتابىنىڭ وكىلدەرى قاتىستى.
ال زەرەندى اۋدانىندا ەكولوگيالىق ءىس-شارالار بارلىق ەلدى مەكەندەردە ءوتتى. «يگى ىستەر كۇنى» اياسىندا تۇرعىندار، مەملەكەتتىك مەكەمە قىزمەتكەرلەرى، قوعامدىق ۇيىمداردىڭ وكىلدەرى مەن بەلسەندى ازاماتتار اۋماقتاردى سانيتارلىق تازارتۋ جانە اباتتاندىرۋ جۇمىستارىن جۇرگىزدى.
اكتسياعا بارلىعى 300-گە جۋىق ادام قاتىستى. جۇمىستاردى جۇرگىزۋگە 10 ارنايى تەحنيكا جۇمىلدىرىلدى. ەلدى مەكەندەردەن 15 توننا قوقىس پەن تۇرمىستىق قالدىق شىعارىلدى. كوشەلەر، قوعامدىق ورىندار، اۋلالار جانە بەكىتىلگەن اۋماقتار تازارتىلدى.
ايتا كەتەيىك، زەرەندى اۋىلىندا ەكولوگيالىق اكتسياعا 90 ادام قاتىستى. مۇندا كوشەلەر مەن بەكىتىلگەن اۋماقتار تازارتىلىپ، ءبىر تونناعا جۋىق قوقىس جينالىپ، شىعارىلدى.
جالپى، اتالعان اكتسيالار اقمولا وبلىسىندا «تازا قازاقستان» قاعيداتتارىن ىسكە اسىرۋعا باعىتتالعان جۇيەلى جۇمىستىڭ ءبىر بولىگى بولدى. باستامالار تۇرعىنداردىڭ ەكولوگيالىق مادەنيەتىن ارتتىرىپ، قورشاعان ورتاعا جاۋاپكەرشىلىكپەن قاراۋ كوزقاراسىن قالىپتاستىرۋعا باعىتتالعان.
