دەرەككوز: "قوستاناي تاڭى"
قوستانايدا قۇرىلتاي دەپۋتاتتارىن سايلاۋعا ونەر جانە مادەنيەت سالاسىنىڭ وكىلدەرى دە بەلسەندى قاتىسىپ جاتىر. قازاقستاننىڭ حالىق اقىنى ءاسيا بەركەنوۆا جۇبايى تابىلدى اعامەن بىرگە جاستار سارايىندا ورنالاسقان №857 سايلاۋ ۋچاسكەسىنە كەلىپ، العاش رەت ءوتىپ جاتقان قۇرىلتاي سايلاۋىندا ءوز تاڭداۋىن جاسادى.
داۋىس بەرگەننەن كەيىن حالىق اقىنى جاڭا قۇرىلتايدىڭ ەلدىڭ ساياسي جانە الەۋمەتتىك دامۋىنداعى رولىنە قاتىستى پىكىرىن ءبىلدىردى.
– ەلدىڭ حالىقارالىق بەدەلى ارتىپ كەلەدى. ەندى وسى جەتىستىكتەردى ودان ءارى نىعايتىپ، جاڭا قازاقستان رەفورمالارىن جۇزەگە اسىرۋ ءۇشىن مىقتى پارلامەنت، ياعني مىقتى قۇرىلتاي قاجەت دەپ ويلايمىن، – دەدى ءاسيا بەركەنوۆا.
ونىڭ پىكىرىنشە، قۇرىلتاي ەلدىڭ وزەكتى ماسەلەلەرىن شەشۋگە باعىتتالعان ساپالى زاڭنامالىق باستامالارعا باسىمدىق بەرۋى ءتيىس. دەپۋتاتتار ءبىلىمدى، بىلىكتى، وتانشىل ءارى ەل مۇددەسىن جوعارى قوياتىن ازاماتتاردان جاساقتالۋى ماڭىزدى.
حالىق اقىنى «تازا قازاقستان» ۇعىمىنىڭ ءمانى تەك قورشاعان ورتانىڭ تازالىعىمەن شەكتەلمەيتىنىن اتاپ ءوتتى.
– تازا قازاقستان دەگەنىمىز – تابيعاتى عانا تازا ەمەس، ار-وجدانى تازا، ادىلەتتى، حالىقتىق قازاقستان. ەلدى وسىنداي مىقتى زاڭدارمەن قامتاماسىز ەتىپ، قوعامنىڭ ادىلەتتى دامۋىنا جول اشاتىن قۇرىلتاي قۇرىلسا ەكەن دەگەن نيەتپەن ءوز داۋىسىمدى بەردىم، – دەدى ول.
ءاسيا بەركەنوۆانىڭ ايتۋىنشا، ەلدىڭ بولاشاعىنا قاتىستى شەشىمدەرگە ءار ازامات جاۋاپكەرشىلىكپەن قاراپ، سايلاۋعا بەلسەندى قاتىسۋى ماڭىزدى.
