اقش-تا ارالىق سايلاۋ ءوتىپ جاتقان كەزدە نيۋ-يورك شتاتىنىڭ ۋەستچەستەر وكرۋگىندە داۋىس ساناۋ جۇيەسىندە تەحنيكالىق اقاۋ بولدى. وكرۋگتىڭ 45 مۋنيتسيپاليتەتىنىڭ 44-ىندە بيۋللەتەندەردى سكانەرلەيتىن قۇرىلعىلار ىستەن شىققان، دەپ حابارلايدى «ادىرنا» ءتىلشىسى CNN-گە سىلتەمە جاساپ.
جەرگىلىكتى بيلىك اقاۋعا باعدارلامالاۋدا جىبەرىلگەن قاتەلىك سەبەپ بولعانىن مالىمدەگەن. سوعان قاراماستان، بيلىك وكىلدەرى پايدالانىلعان بارلىق قاعاز بيۋللەتەن تولىق ساناقتان وتەتىنىن حابارلاعان. اقاۋدى جويۋ جانە سايلاۋ پروتسەسىن جالعاستىرۋ ءۇشىن وڭىرگە قوسىمشا رەزەرۆتىك قۇرىلعىلار جىبەرىلگەن.
تەحنيكالىق اقاۋ اقش وكىلدەر پالاتاسىنداعى ورىن ءۇشىن رەسپۋبليكاشىل مايك لوۋلەر مەن دەموكرات كەيت كونلي اراسىندا تارتىستى باسەكە ءجۇرىپ جاتقان وكرۋگتە تىركەلگەن.
وقيعادان كەيىن ينتەرنەتتە سايلاۋدىڭ قاۋىپسىزدىگىنە قاتىستى ءتۇرلى مالىمدەمەلەر مەن زاڭبۇزۋشىلىقتار تۋرالى ايىپتاۋلار تاراي باستاعان. الايدا بۇل مالىمدەمەلەردى راستايتىن سايلاۋ كەزىندەگى الاياقتىق دەرەكتەرى ازىرگە انىقتالعان جوق.
ايتا كەتەيىك، سايلاۋ ناتيجەلەرى ءجىتى باقىلانىپ وتىرعان وڭىردەگى تەحنيكالىق اقاۋ داۋىس ساناۋ جانە قورىتىندىنى جاريالاۋ پروتسەسىنە قاتىستى جاڭا پىكىرتالاستارعا سەبەپ بولۋى مۇمكىن.
"رەسەي اسپانىن بەلگىسىز اسكەري ۇشاقتار تورىدى" - شۇعىل تۇردە سانكت-پەتەربوردىڭ اۋە كەڭىستىگى جابىلدى
