بۇگىن استانادا ەۋروپاداعى قاۋىپسىزدىك جانە ىنتىماقتاستىق ۇيىمىنىڭ دەموكراتيالىق ينستيتۋتتار جانە ادام قۇقىقتارى جونىندەگى بيۋروسىنىڭ سايلاۋدى باقىلاۋ جونىندەگى حالىقارالىق ميسسياسىنىڭ ءباسپاسوز كونفەرەنتسياسى ءوتتى. شارا بارىسىندا حالىقارالىق بايقاۋشىلار قازاقستانداعى قۇرىلتاي سايلاۋىنا قاتىستى ماڭىزدى دەرەكتەرمەن ءبولىستى.
ەقىۇ دياقب ميسسياسى قازاقستانداعى سايلاۋدىڭ وڭ باعالعان تۇستارىنا سايلاۋشىلار ءتىزىمىنىڭ دۇرىستىعىن، تىزىمدەردىڭ قولجەتىمدىلىگىن، داۋىس بەرۋدىڭ ارنايى تەتىكتەرى مەن مۇگەدەكتىگى بار ازاماتتارعا ارنالعان شارالاردى قوستى.
وسك جۇرگىزەتىن سايلاۋشىلاردىڭ ۇلتتىق تىزىمىنە 2 تامىزداعى جاعداي بويىنشا 12 605 788 ازامات ەنگىزىلگەن. ميسسيا سۇحباتتاسقان ازاماتتاردىڭ باسىم كوپشىلىگى ءتىزىمنىڭ دۇرىستىعىنا سەنىم بىلدىرگەن. سايلاۋشىلاردىڭ ءتىزىمى ازاماتتاردىڭ تانىسۋى ءۇشىن قولجەتىمدى بولدى.
جۇيەدە ءارتۇرلى ومىرلىك جاعدايلارعا بايلانىستى داۋىس بەرۋ قۇقىعىن جۇزەگە اسىرۋعا مۇمكىندىك بەرەتىن بىرنەشە تەتىك قاراستىرىلعان. سايلاۋ كۇنى تۇرعىلىقتى جەرىنەن تىس جەردە بولعان ازاماتتار داۋىس بەرەتىن جەرى بويىنشا تىزىمگە الدىن الا ءوتىنىش بەرۋ ارقىلى ەنگىزىلە الدى. سونداي-اق، باسقا ۋچاسكەدە داۋىس بەرۋگە مۇمكىندىك بەرەتىن ەسەپتەن شىعارۋ كۋالىكتەرى قولدانىلدى.
دەنساۋلىعىنا بايلانىستى قيىندىقتارى بار سايلاۋشىلارعا، وتباسى مۇشەلەرىنە كۇتىم جاسايتىن ازاماتتارعا، سونداي-اق شالعاي اۋدانداردا تۇراتىن ادامدارعا ءتيىستى ءوتىنىش بەرگەن جاعدايدا سايلاۋ ۋچاسكەسىنەن تىس جەردە داۋىس بەرۋ مۇمكىندىگى قاراستىرىلدى. زاڭدا كوزدەلگەن جاعدايلار بويىنشا دا ارنايى سايلاۋ ۋچاسكەلەرى قۇرىلدى.
تىركەلگەن مەكەنجايى جوق ازاماتتار ءۇشىن دە ارنايى شەشىم قاراستىرىلدى. داۋىس بەرۋ كۇنى ولار ەل بويىنشا 221 سايلاۋ ۋچاسكەسىندە ىسكە قوسىلعان ونلاين جۇيە ارقىلى تىركەۋدەن وتە الدى.
سايلاۋ اكىمشىلىگى مۇگەدەكتىگى بار ادامدار ءۇشىن داۋىس بەرۋدىڭ قولجەتىمدىلىگىنە ەرەكشە نازار اۋداردى. بارلىعى بىردەي داۋىس بەرە الۋى ءۇشىن كوميسسيا مۇشەلەرى ارنايى دايارلاۋ باعدارلاماسىنان ءوتىپ، وسىنداي سايلاۋشىلارمەن ءوزارا ءىس-قيمىل جاساۋعا ارنالعان ارنايى بەينەدارىس العان. وسك وتىرىستارىندا قازاق جانە ورىس تىلدەرىندەگى ىلەسپە سۋردو اۋدارما قامتاماسىز ەتىلدى.
اشىقتىق سايلاۋ پروتسەسىنىڭ ماڭىزدى ەلەمەنتتەرىنىڭ ءبىرى بولدى. قولدانىستاعى زاڭناما، سونىڭ ىشىندە سوڭعى تۇزەتۋلەر مەن زاڭعا تاۋەلدى اكتىلەردىڭ باسىم بولىگى اشىق قولجەتىمدىلىكتە جاريالاندى.
سايلاۋ پروتسەسىنە قاتىسۋشىلار ءۇشىن قۇقىقتىق قورعاۋ تەتىكتەرى دە قولجەتىمدى بولعان. ازاماتتار، پارتيالار جانە باسقا دا سۋبەكتىلەردىڭ سايلاۋعا قاتىستى داۋلارى بويىنشا كوميسسيالارعا، سوتتارعا نەمەسە پروكۋراتۋرا ورگاندارىنا جۇگىنە الدى. بۇل رەتتە زاڭنامادا مۇنداي وتىنىشتەردى قاراۋدىڭ قىسقارتىلعان مەرزىمدەرى كوزدەلگەن.
وسى تەتىكتەردىڭ جيىنتىعى سايلاۋدىڭ ماڭىزدى قىرىن قالىپتاستىرادى: ازاماتتىڭ داۋىس بەرۋ قۇقىعىنا يە بولىپ قانا قويماۋى كەرەك، سونىمەن قاتار ءوزىنىڭ سايلاۋشىلار تىزىمىندەگى مالىمەتتەرىن تەكسەرىپ، ەرەكشە جاعدايلاردا داۋىس بەرىپ، قۇقىقتىق قورعاۋ تەتىكتەرىن پايدالانا الۋى كەرەك. ميسسيانىڭ وسى باعىتتاعى وڭ باعاسى راسىمدەردىڭ دۇرىستىعىنا، ولاردىڭ قولجەتىمدىلىگى مەن اشىقتىعىنا ەرەكشە ءمان بەرىلگەنىن كورسەتەدى.
