قازىبەك يسا: ۇلىتاۋدا ۇلى حانىمىزدى ۇمىتپاۋ كەرەك ەدى…

4593
Adyrna.kz Telegram

ۇلىتاۋداعى قۇرىلتاي - ۇلت بولىپ ۇيىسۋدىڭ ءساتتى قادامى! كوپتەگەن ماڭىزدى تاقىرىپتار ايتىلدى. قر پرەزيدەنتى ق.توقاەۆتىڭ بايانداماسىندا ەل كۇتىپ جۇرگەن وزەكتى ماسەلەلەر كوتەرىلدى.

ەلدىڭ ەگەمەندىك دەكلاراتسياسى قابىلدانعان ۇلتتىق مەرەكەمىزدى قايتارىپ بەردى. قاسيەتتى تاۋەلسىزدىككە ءار قادام ءبىز ءۇشىن ەرەكشە قاستەرلى.

قر پارلامەنتى ءماجىلىسى توراعاسى ەرلان قوشانوۆ، بەلگىلى ساياساتكەر ءاليحان بايمەنوۆ، اكادەميك اسقار جۇمادىلداەۆ، اقىن سۆەتقالي نۇرجاندار ەلىمىزدىڭ قوعامدىق-ساياسي، مادەني-تاريحي، ءبىلىمى سالاسىندا تەرەڭ تولعاپ، ۇتىمدى ۇسىنىستار ءبىلدىردى.

قۇرىلتايدىڭ ەل ەرەكشە قۋانعان شىرقاۋى الەمگە ايگىلى اقىن مۇقتار شاحانوۆتىڭ “قازاقستاننىڭ ەڭبەك ەرى” اتاعىمەن ماراپاتتالۋى بولدى!
ۇلى دالاداعى ۇلىتاۋدىڭ تورىندە ۇلى اقىننىڭ كەۋدەسىنە التىن جۇلدىزدى قر پرەزيدەنتى قاسىم-جومارت توقاەۆتىڭ ءوزى تاقتى!
ەل كۇتكەن ەرەكشە ماراپات! حالىقتىڭ شىن ىقىلاسى!

بىراق، ءبىر ايتارىمىز، ۇلىتاۋدا، ۇلى حانىمىز - جوشى حاننىڭ باسىندا وتكەن قۇرىلتايدا جوشى حاننىڭ كەلەر جىلى، 2023 جىلى تاققا وتىرۋىنىڭ 800 جىلدىعىن مەملەكەتتىك دەڭگەيدە ۇلت بولىپ، ۇلىقتاۋ ماسەلەسىن ۇمىتپاۋ كەرەك ەدى!..

جوشى حان - التىن وردانىڭ اتاسى، بۇكىل قازاق حاندارىنىڭ باباسى عوي!

ءبىز بۇل ۇسىنىسىمىزدى بۇدان ءۇش جىل بۇرىن دا، 2019 جىلى ۇلتتىق كەڭەستىڭ العاشقى وتىرىسىندا جاساعان باياندامامىزدا دا ايتقانبىز. ودان بەرى التىن وردانىڭ 750 جىلدىعىندا جوشى حانعا ەسكەرتكىش قويىلىپ، كەيىن كينو تۇسىرەتىن بولىپ شەشىلگەنمەن، تۇتاس كەشەندى باعدارلاما قولعا الىنعان جوق ءالى.

الەمدەگى گەوساياسي دۇربەلەڭدەر دۇبىرىندە ەل بولىپ، ۇلى حانىمىزدى ۇلىقتاۋ - ۇلتتىق پاتريوتتىق جاڭعىرۋعا، رۋحاني جاڭارۋعا رەنەسسانستىق سەرپىن بەرەتىنى انىق.

قۇرىلتايدا كوتەرىلگەن قۇندى ماسەلەلەردىڭ ىسكە اسۋىن كۇتەمىز.

قازىبەك يسا

 

پىكىرلەر