اقش-تىڭ سايلانعان پرەزيدەنتى دونالد ترامپ ايوۆا شتاتىنىڭ بەدەلدى Des Moines Register گازەتىنە، ونىڭ باس كومپانياسىنا جانە بۇرىنعى ساۋالناما جۇرگىزۋشى دج. ەنن زەلتسەرگە قارسى سوت ءىسىن باستادى، دەپ حابارلايدى "ادىرنا" ۇلتتىق پورتالى ۆۆس-گە سىلتەپ.
ترامپ ولاردى 2024 جىلعى پرەزيدەنتتىك سايلاۋ الدىنداعى «سايلاۋعا ورەسكەل ارالاسۋ» ارەكەتى ءۇشىن ايىپتاپ وتىر.
2 قاراشادا جاريالانعان ساۋالنامادا ترامپتىڭ ايوۆا شتاتىندا كامالا حارريسكە بىرنەشە پايىزدىق كورسەتكىش بويىنشا ۇتىلىپ جاتقانىن كورسەتكەن. بۇل شتاتتا ترامپ 2016 جانە 2020 جىلدارى ايقىن جەڭىسكە جەتكەن بولاتىن. ساۋالناما اۆتورى دج. ەنن زەلتسەردىڭ زەرتتەۋلەرى بۇرىننان جوعارى بەدەلگە يە بولعان. بىراق ترامپ بۇل جولعى ناتيجەلەردى «قاساقانا بۇرمالاۋشىلىق» دەپ اتادى.
ترامپتىڭ ايتۋىنشا، ساۋالناما ناتيجەلەرى «قوعامدىق پىكىردى مانيپۋلياتسيالاۋ جانە سايلاۋ ناتيجەلەرىنە اسەر ەتۋ ءۇشىن» جاسالعان. دەگەنمەن، سايلاۋ كۇنى ترامپ ايوۆا شتاتىندا 13 پايىزدىق ارتىقشىلىقپەن جەڭىسكە جەتتى.
سوتتا ترامپ Des Moines Register باسىلىمىنان قارجىلىق وتەماقى تولەۋدى جانە ساۋالناما ناتيجەلەرىنىڭ بارلىق ادىسنامالىق دەرەكتەرىن اشۋدى تالاپ ەتتى.
«مەنىڭ ويىمشا، بۇل تەك بۇرمالاۋ ەمەس، تىكەلەي الاياقتىق پەن سايلاۋعا ارالاسۋ. مۇنداي جاعدايلارمەن كۇرەسۋ كەرەك»، — دەدى ترامپ ءباسپاسوز ءماسليحاتىندا.
گازەت وكىلى لارك-ماري انتون ساۋالناما ءادىسناماسى تولىق جاريالانعانىن جانە سوڭعى ناتيجەلەردىڭ ترامپتىڭ جەڭىسىن ءدال كورسەتپەگەنىن مويىندادى. ول باسىلىمنىڭ ءىس-ارەكەتىن زاڭدى دەپ ساناپ، سوت تالاپتارىنىڭ ورىندالماۋىن كۇتەتىنىن ايتتى.
بۇل وقيعا ترامپتىڭ اقش مەدياسىنا قاتىستى سىنشىل كوزقاراسىنىڭ جالعاسى رەتىندە قاراستىرىلۋدا. بۇعان دەيىن ABC News تەلەارناسى ترامپقا قاتىستى مالىمدەمەسى ءۇشىن كەشىرىم سۇراپ، ونىڭ قورى مەن بولاشاق مۋزەيىنە 15 ملن دوللار قايىرىمدىلىق تولەۋگە كەلىسكەن.
ايتا كەتەيىك، ترامپتىڭ اقش مەدياسىنا قارسى بۇل ارەكەتى ونىڭ سايلاۋداعى جەڭىسىنەن كەيىن دە جالعاسىپ وتىر.
