قۇرىلتاي سايلاۋىنىڭ العاشقى ساعاتتارىندا ناۋرىزباي اۋدانىنداعى №542 سايلاۋ ۋچاسكەسىندە ەرەكشە كوڭىل كۇي ورنادى. داۋىس بەرۋگە كەلگەن تۇرعىنداردى اق جاۋلىقتى انالار ۇلتتىق داستۇرمەن شاشۋ شاشىپ قارسى الدى.
ۇلتتىق سالتپەن باستالعان بۇل ءسات سايلاۋ كۇنىنە مەرەكەلىك رەڭك بەرىپ، جينالعان جۇرتقا كوتەرىڭكى كوڭىل كۇي سىيلادى.
«بۇگىنگى سايلاۋ — ەل بولاشاعىن ايقىندايتىن ماڭىزدى وقيعا. سوندىقتان ازاماتتىق جاۋاپكەرشىلىك تانىتىپ، تاڭداۋ جاساۋ ءۇشىن كەلدىك»، — دەدى اۋدان تۇرعىندارى.
ناۋرىزباي اۋداندىق اقساقالدار كەڭەسىنىڭ توراعاسى مادەنيەت جاركەنوۆ جاستارعا ۇلگى بولۋ ءۇشىن سايلاۋ ۋچاسكەسىنە العاشقىلاردىڭ ءبىرى بولىپ كەلگەنىن ايتتى.
«جاستارعا ۇلگى كورسەتۋ ءۇشىن العاشقىلاردىڭ قاتارىندا كەلىپ، داۋىس بەردىك. ەلىمىزدىڭ جارقىن بولاشاعىنا سەنەمىز. پارتيالاردىڭ باعدارلامالارىمەن تانىستىق»، — دەدى ول.
ال ورال نۇرمۇحانبەتوۆا سايلاۋ ناتيجەسىندە الەۋمەتتىك سالادا وڭ وزگەرىستەر بولادى دەپ ۇمىتتەنەتىنىن جەتكىزدى.
«جەكە تۇلعانى قورعاۋ، قوعامدىق ءتارتىپ پەن قاۋىپسىزدىك ماسەلەلەرىنە باسىمدىق بەرىلەدى دەپ سەنەمىز. ەلىمىزدە تۇراقتىلىق پەن بەيبىتشىلىك ساقتالىپ، حالىقتىڭ ءال-اۋقاتى ارتا بەرسە ەكەن»، — دەدى ول.
ايتا كەتەيىك، №542 سايلاۋ ۋچاسكەسى №187 مەكتەپتىڭ عيماراتىندا ورنالاسقان. تاڭنان بەرى مۇندا سايلاۋشىلار بەلسەندى كەلىپ جاتىر. داۋىس بەرۋگە بارلىق قاجەتتى جاعداي جاسالىپ، سايلاۋ ۇدەرىسى بەلگىلەنگەن تارتىپكە ساي ۇيىمداستىرىلعان.
