قازاقستان رەسپۋبليكاسى ورتالىق سايلاۋ كوميسسياسى 2026 جىلعى 23 تامىزعا تاعايىندالعان قازاقستان رەسپۋبليكاسى قۇرىلتايى دەپۋتاتتارىنىڭ سايلاۋىن دايىنداۋ مەن وتكىزۋدىڭ نەگىزگى ءىس-شارالارىنىڭ كۇنتىزبەلىك جوسپارىن بەكىتتى.
«كۇنتىزبەلىك جوسپاردىڭ بەكىتىلۋى سايلاۋ ناۋقانىنىڭ رەسمي باستالعانىن بىلدىرەدى. بۇل قۇجات قازاقستان رەسپۋبليكاسىنىڭ كونستيتۋتسياسى مەن «قازاقستان رەسپۋبليكاسىنداعى سايلاۋ تۋرالى» كونستيتۋتسيالىق زاڭعا سايكەس بارلىق سايلاۋ راسىمدەرىنىڭ كەزەكتىلىگى مەن مەرزىمدەرىن ايقىندايدى، ولاردىڭ ۋاقتىلى ۇيىمداستىرىلۋىن قامتاماسىز ەتەدى جانە سايلاۋ پروتسەسىنە قاتىسۋشىلاردىڭ بارلىعى ءۇشىن تەڭ قۇقىقتىق جاعداي قالىپتاستىرادى»، – دەدى قازاقستان رەسپۋبليكاسى ورتالىق سايلاۋ كوميسسياسى توراعاسىنىڭ ورىنباسارى مۇحتار ەرمان.
ونىڭ ايتۋىنشا، كۇنتىزبەلىك جوسپارعا سايكەس، 2–13 شىلدە ارالىعىندا (ساعات 18:00-گە دەيىن) ساياسي پارتيالار پارتيالىق تىزىمدەرىن ۇسىنا الادى. كانديداتتاردىڭ قازاقستان رەسپۋبليكاسىنىڭ كونستيتۋتسياسى مەن «قازاقستان رەسپۋبليكاسىنداعى سايلاۋ تۋرالى» كونستيتۋتسيالىق زاڭ تالاپتارىنا سايكەستىگى تەكسەرىلگەننەن كەيىن ورتالىق سايلاۋ كوميسسياسى ولاردى تىركەيدى. تىركەۋ داۋىس بەرۋ كۇنىنە 30 كۇن قالعاندا، ياعني 23 شىلدە كۇنى ساعات 18:00-دەن كەشىكتىرىلمەي اياقتالادى.
سايلاۋ الدىنداعى ۇگىت جۇمىستارى 2026 جىلعى 23 شىلدە ساعات 18:00-دەن كەيىن باستالىپ، 22 تامىز ساعات 00:00-گە دەيىن جالعاسادى. 22 تامىز – تىنىشتىق كۇنى. بۇل كۇنى سايلاۋالدى ۇگىت جۇرگىزۋگە جول بەرىلمەيدى.
16 شىلدەدەن كەشىكتىرىلمەي سايلاۋ ۋچاسكەلەرىنىڭ شەكارالارى مەن ۋچاسكەلىك سايلاۋ كوميسسيالارىنىڭ قۇرامدارى جاريالانادى.
2 تامىزدا جەرگىلىكتى اتقارۋشى ورگاندار سايلاۋشىلار تىزىمدەرىن ۋچاسكەلىك سايلاۋ كوميسسيالارىنا بەرەدى، ال 7 تامىزدان باستاپ سايلاۋشىلار تىزىممەن تانىسىپ، ونداعى دەرەكتەردىڭ دۇرىستىعىن تەكسەرە الادى.
داۋىس بەرۋ 23 تامىز كۇنى جەرگىلىكتى ۋاقىت بويىنشا ساعات 07:00-دەن 20:00-گە دەيىن وتەدى. سايلاۋ ۋچاسكەلەرى جابىلعاننان كەيىن داۋىستاردى ساناۋ باستالادى، ال سايلاۋ قورىتىندىلارىن ورتالىق سايلاۋ كوميسسياسى ون كۇن ىشىندە انىقتايدى.
