2 ميلليونعا جۋىق ادام تۇراقتى تۇراتىن الماتى قالاسى ەلىمىزدىڭ ەڭ ءىرى ەكونوميكاسى سانالادى. بيۋدجەتكە تۇسەتىن تۇسىمدەردىڭ 23,4 پايىزى، بانكتەردىڭ كرەديتتىك پورتفەلىنىڭ 62,4 پايىزى، ەل ىشىندەگى ساۋدا وپەراتسيالارىنىڭ 38 پايىزى الماتىدا جۇزەگە اسىرىلادى. قازاقستان ەكونوميكاسىنىڭ 19,6 پايىزى الماتىنىڭ ەنشىسىندە. سونىمەن قاتار، ەلىمىز بويىنشا جۇمىس ىستەيتىن حالىقتىڭ شامامەن 15 پايىزىن جۇمىسپەن قامتاماسىز ەتەدى. قارجى ورتالىعى سانالاتىن قالاعا كۇندەلىكتى 500 مىڭعا جۋىق ادام كىرىپ-شىعادى. سول سەبەپتى الماتى اكىمدىگىنە ەكونوميكالىق كورسەتكىشىن جاقسارتا ءتۇسۋ مەن ينفراقۇرىلىمىن دامىتۋدىڭ ءتۇسۋدىڭ ماڭىزى زور.
بۇرىنعى اكىم نە ىستەدى؟
قالا اكىمى بولىپ باقىتجان ساعىنتاەۆ كەلگەنگە دەيىن باۋىرجان بايبەك حالىقتىڭ ءجۇرىس-تۇرىسىنا ىڭعايلى بىرنەشە وڭتايلى شەشىمدەر قابىلدادى. ونىڭ العاشقىسى – نەگىزگى كوشەلەردە قوعامدىق كولىك جولاعىنىڭ سالىنۋى. بۇل ءوز كەزەگىندە كولىگى كوپ مەگاپوليستىڭ تۇرعىندارىنا جەتەر جەرىنە بۇرىنعىدان قاراعاندا تەزىرەك جەتۋىنە سەپتىگىن تيگىزدى. كولىك اپاتى ازايدى. ورتالىق كوشەلەردىڭ بويىنان ۆەلوجولدار اشىلدى. پانفيلوۆ كوشەسىنىڭ سىرت كەلبەتى وزگەرتىلىپ، جاياۋ جۇرگىنشىلەرگە لايىقتالدى. قازىر بۇل كوشە سەرۋەن قۇرۋشىلار ءۇشىن وتە قولايلى بولىپ وتىر.
قالا ورتالىعىندا اقىلى اۆتوتۇراقتاردىڭ اشىلۋى مەن بارلىق مەكەمەلەردىڭ قورشاۋلارىن الىپ تاستاۋى، سونداي-اق قوعامدىق كولىكتەردىڭ «وڭاي» تولەم جۇيەسىنە كوشىرىلۋى سىندى جۇمىستار ءوز تيىمدىلىگىن دالەلدەدى. سپورتتىق جانە مادەني نىسانداردىڭ سالىنۋ دا قالا كوركىنە ءسان قوسىپ، جۇرتشىلىقتىڭ دەمالىس ۋاقىتىن جاقسى وتكىزۋىنە جاعداي جاسادى. اتاپ ايتساق، ەلەگى ەپيدەميولوگيالىق جاعدايدى ەسەپتەمەگەندە «الماتى-ارەنا»، «حالىق-ارەنا» سپورتتىق نىساندارى مەن «الاتاۋ» ءداستۇرلى ونەر تەاترى حالىق يگىلىگىنە قىزمەت ەتۋدە.
قازىرگى اكىمنىڭ الدىندا قانداي مىندەتتەر بار؟
تىرشىلىگى قىز-قىز قايناعان الماتىنىڭ باس اۋىرتار ءبىر تۇسى – اتاقتى «التىن وردا» بازارىنىڭ تاس جولى ەتىن. الماتى قالاسى مەن قاراساي اۋدانىنىڭ تۇرعىندارىن بايلانىستىراتىن ء(ارى رەسپۋبليكالىق ماڭىزدى جول – رەد.) كۇرە جول كەڭەيتىلىپ، حالىق بيىلعى جىلدىڭ سوڭىنا دەيىن كەپتەلىس ازابىنان قۇتىلاتىن بولدى. ماماندار «التىن وردا» كەپتەلىسىنىڭ جويۋىلۋىن تۇرعىندارعا جايلىلىعىمەن قاتار ەكونوميكالىق تيىمدىلىك اكەلەدى دەپ بولجاپ وتىر.
قازىر قالا باسشىلىعىنىڭ الدىندا:
- شەت ايماعى جوق قالا;
- «اقىلدى» قالا;
- تەڭ مۇمكىندىكتەر قالاسى
- قاۋىپسىز قالا;
- جاھاندىق ىسكەرلىك ورتالىق
- مادەني كرەاتيۆتى قالا سەكىلدى جوسپارلار بار.
باقىتجان ساعىنتاەۆ "الماتى - 2050" ستراتەگيانسىندا قالانى الەمدەگى ەڭ دامىعان 100 قالانىڭ قاتارىنا قوساتىنىن مالىمدەگەن.
"ادىرنا" ۇلتتىق پورتالى
