«تاۋەلسىز باقىلاۋشىلار» ۇيىمىن باسقارىپ، سايلاۋدىڭ ءادىل وتۋىنە اتسالىسقان ارايلىم نازاروۆا ماجوريتارلىق سايلاۋ جۇيەسى بويىنشا سىنعا ءتۇسىپ جاتىر. ناقتىراق ايتساق ول الماتى قالاسىنىڭ №4 سايلاۋ وكرۋگىنان ءماجىلىس دەپۋتاتتىعىنا ۇمىتكەر.
ارايلىم نازاروۆا ءوز ۇندەۋىندە حالىققا ءۇيىپ-توگىپ ۋادە بەرمەيتىنىن، تەك ءار ازاماتقا قولجەتىمدى دەپۋتات بولاتىنىن ايتتى.
«قۇرمەتتى سايلاۋشى، ءسىزدىڭ كوكەيىڭىزدەگى سۇراققا مەن دە جاۋاپ ىزدەپ كەلەمىن، دەمەك ءبىزدىڭ پروبلەمامىز ورتاق... ول ەڭ اۋەلى – ادىلەتسىزدىك، جەمقورلىقتىڭ قۇرساۋىنداعى جۇيە.
مەنىڭ سايلاۋ الدى باعدارلامام دەپ ءۇيىپ-توگىپ جاقسى سوزدەردى جاۋدىرعىم كەلمەيدى، الداعىم كەلمەيدى. سايلاۋالدى باعدارلامامدى ءبىزدىڭ پارلامەنتتىڭ قۇزىرەتىنە جاتپايتىن دۇنيەلەردى جۇزەگە اسىرامىن دەپ ادەمى ۋادەلەرگە تولتىرعىم دا كەلمەيدى.
ءبىر نارسە عانا ۋادە ەتە الامىن. ول - ءسىزدىڭ قولىڭىز جەتە الاتىن، ءسىز حابارلاسا الاتىن دەپۋتات بولۋ. ماقساتىم: ءار زاڭ جوباسىنا قاتىستى ءسىزدىڭ پىكىرىڭىزدى سول مىنبەرگە جەتكىزۋ، ءار تالقىلاۋدا حالىقتىڭ مۇددەسىن ءبىرىنشى ورىنعا قويۋ، ءار ازاماتتىڭ پايداسىنا شەشىلەتىن جوبالارمەن اينالىسۋ. مەن دە ءدال سىزدەي:
- تازا ءارى ادىلەتتى سايلاۋدى;
- قۇزىرەتى كەڭ پارلامەنتتى;
- ادىلەتتى سوت جۇيەسىن;
- جەمقورلىق ءۇشىن جازانى كۇشەيتۋدى;
- لايىقتى الەۋمەتتىك كومەكتى;
- زەينەتاقى جاسىنىڭ تومەندەۋىن;
- نەسيە پايىزىنىڭ تومەندىگىن;
- مەملەكەتتىك باعدارلامالاردىڭ دۇرىس جۇزەگە اسۋىن جانە بۇل باعدارلاماعا جاۋاپتى تۇلعالاردىڭ زاڭ الدىندا قاتاڭ جاۋاپ بەرۋىن;
- تۇرمىستىق زورلىق-زومبىلىقتى قىلمىس دەپ تانۋدى;
- ساپالى ەم الاتىن مەديتسينانى;
- قۇقىعىمدى قورعايتىن ىشكى ىستەر ورگانىن;
- جوعارى دەڭگەيدەگى ءبىلىم جۇيەسىن;
- ءار قازاقستاندىقتىڭ باي مەملەكەتتە لايىقتى ءومىر ءسۇرۋىن قالايتىن قازاقتىڭ ءبىر قىزىمىن.
داۋىسىڭىزدى ماعان بەرگەنىڭىز وزىڭىزگە بەرگەن داۋىسىم دەپ ءبىلىڭىز.
سىزدەر تەك مەنىڭ سايلاۋشىم ەمەس، ءبىز ءبىر كوماندا مۇشەسى رەتىندە جۇمىس ىستەيىك.
ءسىزدىڭ پارلامەنتتەگى سەنىمدى وكىلىڭىز بولۋعا دايىنمىن!»، – دەيدى كانديدات.
ەلىمىزدە الداعى جەكسەنبى، ياعني 19 ناۋرىز كۇنى ءماجىلىس پەن ءماسليحات دەپۋتاتتارىن سايلاۋ وتەدى. بيىلعى سايلاۋدىڭ ماجوريتارلىق سايلاۋ جۇيەسى بويىنشا ءوتىپ جاتىر.
ماتەريال سايلاۋ قورىنان تولەندى
