الماتى قالاسىندا كامەلەتكە تولماعان سوتتالعانداردى ۇستاۋعا ارنالعان قىلمىستىق-اتقارۋ جۇيەسىنىڭ جاڭا مەكەمەسى رەسمي تۇردە جۇمىسىن باستادى، دەپ حابارلايدى "ادىرنا" ۇلتتىق پورتالى.
ىشكى ىستەر ءمينيسترى ەرجان سادەنوۆ نىسانعا بارىپ، مەكەمەنىڭ جۇمىس قىزمەتىمەن جانە جاسوسپىرىمدەرگە جاسالعان جاعدايلارمەن تانىستى.
جوبا مەملەكەتتىك-جەكەمەنشىك ارىپتەستىك اياسىندا جۇزەگە اسىرىلعان. وعان ءىىم قىلمىستىق-اتقارۋ جۇيەسى كوميتەتى، الماتى قالاسى اكىمدىگى جانە جەكە كومپانيا قاتىسقان. مەملەكەتتىك بيۋدجەتتەن قاراجات بولىنبەگەن.
200 ورىنعا ەسەپتەلگەن مەكەمەدە سوتتالعاندارمەن جۇمىس حالىقارالىق ستاندارتتارعا ساي جۇرگىزىلەدى. جاسوسپىرىمدەرگە قاۋىپسىز ءارى پسيحولوگيالىق تۇرعىدان قولايلى جاعداي جاسالىپ، ءبىلىم بەرۋ مەن الەۋمەتتىك بەيىمدەۋگە باسىمدىق بەرىلۋدە.
سوتتالعاندار BINOM مەكتەبى مەن كوللەدجىندە ءبىلىم الىپ، دانەكەرلەۋ ءىسى، تىگىن ءوندىرىسى، شاشتاراز ونەرى سەكىلدى سۇرانىسقا يە ماماندىقتاردى مەڭگەرەدى. ولارمەن پەداگوگتەر مەن پسيحولوگتار تۇراقتى جۇمىس جۇرگىزەدى.
مەكەمە اۋماعىندا كىتاپحانا مەن اكت زالى، اسحانا، مەديتسينالىق پۋنكت، فۋتبول الاڭى، باسكەتبول زالى، workout-ايماق، وقۋ سىنىپتارى جانە وندىرىستىك شەبەرحانالار بار.
ىشكى ىستەر ءمينيسترى ەرجان سادەنوۆ بۇل نىساننىڭ اشىلۋى جاسوسپىرىمدەردى قايتا الەۋمەتتەندىرۋ جولىنداعى ماڭىزدى قادام ەكەنىن اتاپ ءوتتى. سونداي-اق پروفيلاكتيكالىق جۇمىستارعا، وتباسىمەن جانە ءبىلىم بەرۋ مەكەمەلەرىمەن بايلانىس ورناتۋعا باسىمدىق بەرۋدىڭ قاجەتتىگىن جەتكىزدى.
مۇنداي كەشەندى قولداۋ سوتتالعانداردىڭ بوستاندىققا شىققاننان كەيىن قوعامعا بەيىمدەلۋىنە جانە قۇقىقبۇزۋشىلىقتاردىڭ الدىن الۋعا باعىتتالعان.
