كوكشەتاۋدىڭ كوكمايسا توسىندە، رۋحانياتتىڭ التىن دىڭگەگىنە اينالعان اباي مۇراسىن ارقاۋ ەتكەن تاعىلىمدى باسقوسۋ ءوتتى. «قوعامدىق كەلىسىم» كمم الاڭىندا ۇيىمداستىرىلعان «قارا سوزدەرگە ساياحات» اتتى ادەبي-مۋزىكالىق كەش – ۇلتتىڭ جان دۇنيەسىن جاڭعىرتقان، وي مەن جۇرەكتى توعىستىرعان مازمۇندى رۋحاني ساتتەردىڭ ءبىرى بولدى.
بۇل كەشتىڭ وزەگىندە – اباي. ونىڭ قارا سوزدەرى. ونىڭ ماڭگىلىك مۇراتى. قازاقتىڭ كەشەگىسى مەن بۇگىنى، بولاشاعى تۋرالى تولعانىسى. حاكىمنىڭ ءاربىر ءسوزى – ۋاقىتتىڭ تەزىنەن وتكەن، ۇلتتىڭ ساناسىنا سىڭگەن اسىل قازىنا ەكەنى تاعى ءبىر مارتە ايقىن سەزىلدى.
كەش تىزگىنىن ۇستاعان ءداستۇرلى ءانشى سارسەنباي حاسەنوۆ اۋەلگى سوزدەن-اق اباي الەمىنە جەتەلەپ، كورەرمەندى ويلى ساپارعا شاقىردى.
«اباي – قازاقتىڭ عانا ەمەس، ادامزاتتىڭ رۋحاني تەمىرقازىعى. ونىڭ قارا سوزدەرى – ءاربىر قازاقتىڭ جۇرەگىنە جول تاباتىن ومىرلىك باعدار. ءبىز ابايدى وقۋ ارقىلى ءوزىمىزدى تانيمىز، ۇلت رەتىندە كەمەلدەنەمىز»، – دەدى ول.
شارادا ايتىلعان ءاربىر پىكىر، وقىلعان ءاربىر ولەڭ – ۇلى ويشىلدىڭ رۋحىمەن ۇندەسىپ جاتتى.
قوعام قايراتكەرى، اقىن ءارى كومپوزيتور كوشەك سامەنوۆ مازمۇندى بايانداماسى كەشتىڭ سالماعىن ارتتىرا ءتۇستى. ول ابايدىڭ قارا سوزدەرىن ۇلتتىڭ رۋحاني تەمىرقازىعى رەتىندە باعالاپ، ولاردىڭ بۇگىنگى قوعام ءۇشىن دە وزەكتىلىگىن تەرەڭ پايىممەن جەتكىزدى. شىن مانىندە، اباي ءسوزى – تەك وتكەننىڭ ەستەلىگى ەمەس، بۇگىنگى كۇننىڭ دە ايناسى.
كەش بارىسىندا اباي ولەڭدەرى ءارتۇرلى ۇنمەن، ءارتۇرلى جۇرەكپەن جاڭعىرىپ وتىردى. قازاق رۋحانياتىنىڭ جاۋھارى سانالاتىن «كوزىمنىڭ قاراسى» مەن «جەلسىز تۇندە جارىق اي» سەكىلدى تۋىندىلار كورەرمەن كوڭىلىن تەربەپ، ونەر مەن ءسوزدىڭ ۇندەستىگىن ايقىن كورسەتتى. بۇل – اباي مۇراسىنىڭ ۇلت پەن ۇلىستى بىرىكتىرەتىن رۋحاني كوپىرگە اينالعانىنىڭ بەلگىسى.
كوكشەتاۋ قالالىق انالار كەڭەسىنىڭ ءتورايىمى ايناگۇل جازيەۆا اباي مۇراسىن ۇرپاق تاربيەسىنىڭ وزەگى رەتىندە قاراستىرىپ، ۇلت بولاشاعىنىڭ رۋحاني نەگىزى وسى قۇندىلىقتاردا جاتقانىن اتاپ ءوتتى. ال اقساقالدار كەڭەسىنىڭ مۇشەسى بولات زاكەنوۆ عىلىم مەن ەڭبەكتى تۋ ەتكەن قوعام عانا اباي اڭساعان بيىككە جەتە الاتىنىن سالماقتى ويمەن جەتكىزدى.
كەشتىڭ ءبىر ەرەكشەلىگى – ەركىن وي الاڭىنىڭ قالىپتاسۋى. قاتىسۋشىلار ابايعا، ونىڭ سوزىنە دەگەن ءوز كوزقاراستارىن ءبىلدىرىپ، پىكىر الماسۋ ارقىلى رۋحاني سۇحباتقا جول اشتى. بۇل – تەك تىڭداۋ ەمەس، وي ءبولىسۋ، تولعانۋ، ءوزىن تانۋ ءساتى بولدى.
ادەبي-مۋزىكالىق كەشتىڭ ءون بويىندا سەزىلگەن باستى قۇندىلىق – بىرلىك. رۋحاني بىرلىك. تانىم مەن تاعىلىمنىڭ بىرلىگى. اباي سوزىنە توقتاعان جۇرتتىڭ جۇرەگىندە ۇلتقا دەگەن جاۋاپكەرشىلىك، بولاشاققا دەگەن سەنىم ايقىن اڭعارىلدى.
وسىنداي مازمۇندى كەشتەر – قوعامنىڭ رۋحاني تامىرىن تەرەڭدەتىپ، ۇلتتىق سانانى جاڭعىرتۋدىڭ ناقتى كورىنىسى. ابايمەن سىرلاسۋ – وزىڭمەن سىرلاسۋ. ال وزىمەن تىلدەسە العان قوعام عانا كەمەلدىككە قادام باسادى.
