بۇگىن اقمولا وبلىسىنىڭ قورعالجىن اۋىلىندا ەكىنشى رەت مادەني-تۋريستىك Flamingo Fest فەستيۆالى ءوتتى، دەپ حابارلايدى "ادىرنا" ءتىلشىسى.
اۋقىمدى شاراعا وبلىستىڭ ءار اۋدانىنان، سونداي-اق استانا مەن كورشىلەس وڭىرلەردەن كەلگەن تۇرعىندار مەن قوناقتار قاتىستى.
فەستيۆالدىڭ باستى ماقساتى – قورعالجىن ءوڭىرىنىڭ مادەنيەتى مەن تابيعي مۇراسىن تانىتىپ، ەكولوگيالىق ءتۋريزمدى دامىتۋ جانە قىزعىلت قوقيقازداردى قورعاۋعا قوعام نازارىن اۋدارۋ.
شارانىڭ ءدال وسى وڭىردە ءوتۋى زاڭدى. قورعالجىن دالاسى مەن كولدەرى الۋان ءتۇرلى قۇس تۇرلەرىنىڭ مەكەنى سانالادى. مۇندا قىزعىلت قوقيقازدار مەكەندەيدى. جىل سايىن مىڭداعان تۋريست پەن تابيعات جاناشىرى وسى بىرەگەي قۇستاردى تاماشالاۋ ءۇشىن وڭىرگە كەلەدى.
"قورعالجىن اۋدانىندا فەستيۆال ەكىنشى رەت ءوتىپ جاتىر. ءبىزدىڭ تابيعاتىمىز بەن مادەنيەتىمىزدى ۇشتاستىرىپ، تۋريستەرىمىزگە كورسەتپەكشىمىز. ءبىزدىڭ اۋداندا 84 كول، قۇستىڭ 365 ءتۇرى بار. وسىنىڭ ءبارى ءبىز ءۇشىن ۇلكەن ماقتانىش! قورعالجىن اۋدانىنا جىلىنا ەكى مىڭداي تۋريست كەلەدى. ونىڭ سانى ەكى-ءۇش ەسە كوبەيسە، ءبىزدىڭ اۋدانعا ەكونوميكالىق ءوسىم اكەلەتىنى ءسوزسىز", - دەدى قورعالجىن اۋدانىنىڭ اكىمى الماس الين.
فەستيۆالدىڭ مادەني باعدارلاماسىن اتباسار اۋدانىنان كەلگەن «مولودوست» حالىق ءانسامبلى اشتى. ونەرپازدار قوقيقازداردىڭ اسەمدىگى مەن قيمىلىن بەينەلەيتىن «فلامينگو» حورەوگرافيالىق قويىلىمىن ۇسىندى. مۋزىكالىق كەشتى قورعالجىن اۋدانىنىڭ «نۇرلى ساز» كۆارتەتى جالعاستىردى.
مەرەكەلىك باعدارلاما اياسىندا Flamingo Art كورمەسى دە ۇيىمداستىرىلدى. كورمەگە اقمولا وبلىسىنىڭ سۋرەتشىلەرى تۋعان ولكەنىڭ تابيعاتىن بەينەلەيتىن تۋىندىلارىن ۇسىندى. كورەرمەندەر كەڭ دالا، كولدەر مەن ءوڭىردىڭ كوركەم تابيعاتىن سۋرەتشىلەر كوزىمەن تاماشالادى.
سونىمەن قاتار جەرگىلىكتى تۇرعىندار مەن فەستيۆال قوناقتارى قولونەر شەبەرلەرىنىڭ جارمەڭكەسىن تاماشالاپ، ساندىك-قولدانبالى ونەر بۇيىمدارىمەن تانىستى.
"اتا-بابامىز ەڭ كوپ قولدانعان ماتەريال - كۇمىس. وسى فەستيۆالگە كۇمىس بۇيىمدارىمدى اكەلدىم. اجەلەرىمىز كۇمىسسىز قامىر يلەمەگەن. قوناققا كەلگەن كىسى ءۇي يەسى، ايەلىنىڭ قولىندا كۇمىس بولماسا، اس ىشپەگەن دەسەدى. ءبىر جۇزىكتى جاساۋعا شامامەن ءبىر كۇندەي ۋاقىتىم كەتەدى", - دەيدى اتا كاسىپتى جالعاستىرعان زەرگەر ەرتاي التايۇلى.
فەستيۆالدىڭ نەگىزگى شارالارىنىڭ ءبىرى – قوقيقازدار مەكەندەيتىن تابيعي اۋماقتارعا ۇيىمداستىرىلعان ەكسكۋرسيالار. قاتىسۋشىلارعا تاجىريبەلى گيدتەر مەن قورىق ماماندارى جول كورسەتىپ، ءوڭىردىڭ ەكوجۇيەسى، قۇستاردىڭ تىرشىلىگى جانە ەرەكشە قورعالاتىن اۋماقتاعى ءتارتىپ تالاپتارى تۋرالى اقپارات بەردى.
فەستيۆال قوناقتارى مەن ەلشىلىك وكىلدەرى ارنايى ۇزىنسور تۇزدى كولىنە بارىپ، جابايى تابيعات اياسىندا قىزعىلت قوقيقازداردى تاماشالادى.
"قوقيقاز ۇنادى، ءبىرىنشى رەت كوردىم. كۇلگىن، كىشكەنە اق پەن قىزعىلت تۇستەس، موينى ۇزىن قۇس. ماعان قاتتى ۇنادى", - دەيدى فەستيۆالدىڭ جاس كورەرمەنى قۇرالاي.
Flamingo Fest العاش رەت وتكەن جىلى قورعالجىن اۋدانىندا ۇيىمداستىرىلعان. مادەنيەت، ەكولوگيالىق اعارتۋ جانە ءتۋريزمدى ءبىر ارناعا توعىستىرعان فەستيۆالگە دەگەن قىزىعۋشىلىقتىڭ ارتۋى ونىڭ بيىل دا وتكىزىلۋىنە نەگىز بولدى.
بۇگىندە Flamingo Fest قورعالجىن ءوڭىرىنىڭ تابيعاتىن، مادەنيەتى مەن ءداستۇرىن كەڭىنەن تانىتاتىن ماڭىزدى تۋريستىك الاڭعا اينالىپ كەلەدى. ال جىل سايىن وسى مەكەنگە قايتا ورالاتىن قىزعىلت قوقيقازدار ءوڭىردىڭ تابيعي بايلىعى مەن باستى سيمۆولدارىنىڭ ءبىرى سانالادى.
