اقمولا وبلىسى استىقتى ەۋروپا نارىعىنا ەكسپورتتاۋدى كەڭەيتىپ، جەرگىلىكتى شارۋاشىلىقتاردىڭ شەتەلدىك ترەيدەرلەرمەن تىكەلەي بايلانىسىن جولعا قويۋدى جوسپارلاپ وتىر. بيىل وڭىردەن شامامەن 2,8 ملن توننا استىق جانە 235 مىڭ توننادان استام مايلى داقىل جونەلتىلدى.
بۇگىن ديپلوماتيالىق ميسسيالاردىڭ وكىلدەرى بۇلاندى اۋدانىنا بارىپ، ەگىن جيناۋ ناۋقانىنىڭ بارىسىمەن جانە جەرگىلىكتى استىقتىڭ ساپاسىمەن تانىستى. شەتەلدىك قوناقتارعا ءوڭىردىڭ اۋىل شارۋاشىلىعى ونىمدەرىن ساقتاۋ جانە تاسىمالداۋ مۇمكىندىكتەرى دە تانىستىرىلدى.
اقمولا وبلىسىنىڭ اكىمى مارات احمەتجانوۆ قۋاڭشىلىققا قاراماستان، وڭىردە ساپالى استىق جينالىپ جاتقانىن اتاپ ءوتتى. ونىڭ ايتۋىنشا، جينالعان بيدايدىڭ شامامەن 90 پايىزى سىرتقى نارىقتا سۇرانىسقا يە جوعارى ساپالى Hi-Pro ساناتىنا جاتادى.
«بيىل مەملەكەت تاراپىنان استىقتى ەۋروپالىق وداق ەلدەرىنە، اتاپ ايتقاندا بالتىق جاعالاۋى پورتتارىنا جەتكىزۋ باعىتىندا ۇلكەن قولداۋ كورسەتىلىپ وتىر. ءبىزدىڭ ماقساتىمىز – شارۋاشىلىقتارىمىزدىڭ سول جاققا وزدەرى بارىپ، ەۋروپالىق ترەيدەرلەرمەن تىكەلەي كەلىسىمشارتتار جاساسۋى جانە ساپالى Hi-Pro استىعىن ەۋروپاعا تىكەلەي جەتكىزۋى»، – دەدى اكىم.
سونىمەن قاتار اقمولالىق استىقتى ەۋروپالىق سەرىكتەستەرگە بريۋسسەلدە تانىستىرۋ مۇمكىندىگى قاراستىرىلىپ جاتىر. بۇل اۋىل شارۋاشىلىعى وندىرۋشىلەرىنە ترەيدەرلەرمەن تىكەلەي كەزدەسىپ، ىنتىماقتاستىق شارتتارى مەن جاڭا جەتكىزىلىمدەردىڭ پەرسپەكتيۆالارىن تالقىلاۋعا مۇمكىندىك بەرەدى.
ايتا كەتەيىك، اقمولالىق استىق بۇعان دەيىن ەستونيانىڭ Muuga پورتى ارقىلى ەۋروپا ەلدەرىنە جەتكىزىلگەن. وڭىردە بۇل باعىتتى ودان ءارى دامىتىپ، ەكسپورت گەوگرافياسىن كەڭەيتۋ جانە ەۋروپالىق سەرىكتەستەرمەن تىكەلەي ساۋدا بايلانىستارىن نىعايتۋ كوزدەلىپ وتىر.
