اقمولا وبلىسىندا تاريحي جادىنى جاڭعىرتىپ، ۇلتتىق قۇندىلىقتاردى ۇلىقتاۋعا باعىتتالعان جاڭا تۋريستىك باستاما قولعا الىنباق. وبلىستىق تۋريزم باسقارماسى ازىرلەپ وتىرعان جوبا ءوڭىردىڭ كيەلى نىساندارىن جۇيەلى تۇردە ناسيحاتتاپ، ىشكى ءتۋريزمنىڭ الەۋەتىن ارتتىرۋدى كوزدەيدى.
بۇگىنگى تاڭدا قوعامدا وتكەنگە تاعزىم مەن تاريحي ساباقتاستىقتىڭ ماڭىزى ارتىپ وتىر. وسى تۇرعىدان العاندا، جاڭا جوبا تەك تۋريستىك ءونىم عانا ەمەس، رۋحاني جاڭعىرۋدىڭ ناقتى كورىنىسى دەۋگە بولادى. جوبا اياسىندا ەلوردالىق ءوڭىر اۋماعىنداعى تاريحي ءارى رۋحاني ماڭىزى زور نىسانداردى قامتيتىن ءۇش تۋريستىك مارشرۋت جاساقتالعان. بۇل باعىتتار ارقىلى ءوڭىر تۇرعىندارى مەن قوناقتارى قازاق حالقىنىڭ باي مۇراسىمەن، سالت-داستۇرىمەن، تاعىلىمدى تاريحىمەن تەرەڭىرەك تانىسۋعا مۇمكىندىك الادى.
اتالعان باستاما شەڭبەرىندە ەلورداداعى 20 تۋروپەراتوردىڭ قاتىسۋىمەن ارنايى اقپاراتتىق تۋر ۇيىمداستىرىلدى. ءىس-شارا بارىسىندا قاتىسۋشىلار جاڭا مارشرۋتتارمەن تانىسىپ، ءاربىر نىساننىڭ تاريحي مازمۇنى مەن مادەني قۇندىلىعى جونىندە جان-جاقتى ماعلۇمات الدى. الداعى كەزەڭدە تۋروپەراتورلار بۇل باعىتتاردى ەكسكۋرسيالىق باعدارلامالارعا ەنگىزىپ، وتاندىق ءتۋريزمنىڭ جاڭا تىنىسىن اشۋعا ىقپال ەتپەك.
مارشرۋت قۇرامىنا ەنگىزىلگەن نىسانداردىڭ ارقايسىسى – قازاق دالاسىنىڭ شەجىرەلى بەتتەرى. اتاپ ايتقاندا، نياز بي كەسەنەسى – ەل بىرلىگى مەن ادىلدىكتىڭ سيمۆولىنا اينالعان كورنەكتى ءبيدىڭ ماڭگىلىك مەكەنى. قابانباي باتىر كەسەنەسى – ەل قورعاۋ جولىندا جانىن قيعان داڭقتى قولباسشىنىڭ رۋحىنا تاعزىم ەتەتىن قاسيەتتى ورىن. ال بىتىعاي كەسەنەسى – ورتاعاسىرلىق ساۋلەت ونەرىنىڭ بىرەگەي ۇلگىسى رەتىندە تاريحي قۇندىلىعىمەن ەرەكشەلەنەدى. قانىكەي مازارى بولسا، حالىق اڭىزدارى مەن دالا رۋحانياتىنىڭ تەرەڭ تامىرىن ايعاقتايتىن كيەلى مەكەن سانالادى.
جالپى، جوبانى جۇزەگە اسىرۋ ءوڭىردىڭ تۋريستىك كارتاسىن كەڭەيتىپ قانا قويماي، قازاقستاننىڭ تاريحي-مادەني مۇراسىنا دەگەن قىزىعۋشىلىقتى ارتتىرۋعا سەرپىن بەرەدى. سونىمەن قاتار بۇل باستاما وسكەلەڭ ۇرپاقتىڭ تۋعان جەرىنە، ۇلتتىق تاريحى مەن رۋحاني قۇندىلىقتارىنا دەگەن قۇرمەتىن قالىپتاستىرۋدا ماڭىزدى ءرول اتقارادى.
تاريح پەن تاعىلىمدى ساباقتاستىرعان مۇنداي جوبالار – ۇلتتىڭ وتكەنىن ۇلىقتاپ، بولاشاعىنا باعدار بەرەتىن يگى قادام. اقمولا وڭىرىندەگى كيەلى باعىتتاردىڭ جاڭعىرۋى – سونىڭ ايقىن دالەلى.
