الداعى سەنبى، 5 قىركۇيەكتە اقمولا وبلىسىنىڭ قورعالجىن اۋدانىندا ءداستۇرلى «Flamingo Fest» مادەني-تۋريستىك فەستيۆالى وتەدى.
فەستيۆالدىڭ باستى ماقساتى – قورعالجىننىڭ تابيعي ەرەكشەلىكتەرىن ۇلتتىق مادەنيەت، ونەر جانە سالت-داستۇرمەن ۇشتاستىرا وتىرىپ، ءوڭىردىڭ تۋريستىك الەۋەتىن تانىتۋ.
فەستيۆالدىڭ سيمۆولى – قورعالجىن ءوڭىرىنىڭ ۆيزيتتىك كارتوچكاسىنا اينالعان قىزعىلت قوقيقاز. باعدارلامادا تابيعاتتى قورعاۋ مەن ەكولوگيالىق مادەنيەتكە ەرەكشە ءمان بەرىلمەك.
فەستيۆال قوناقتارىنا فولكلورلىق جانە بي ۇجىمدارىنىڭ ونەرى، ءداستۇرلى مۋزىكا، گالا-كونتسەرت، ەتنواۋىل جانە ۇلتتىق ويىندار ۇسىنىلادى.
سونىمەن قاتار قولونەر شەبەرلەرىنىڭ كورمە-جارمەڭكەسى ۇيىمداستىرىلىپ، سۋرەتشىلەر اراسىندا «Flamingo Art» وبلىستىق بايقاۋى وتەدى.
ەكولوگيالىق باعدارلاما اياسىندا قورعالجىن مەملەكەتتىك تابيعي قورىعىنىڭ بيوالۋانتۇرلىلىگى، ونىڭ مەكەندەۋشىلەرى جانە تابيعاتتى قورعاۋ ماسەلەلەرى بويىنشا تانىمدىق ءىس-شارالار مەن اكتسيالار وتكىزىلەدى.
ۇيىمداستىرۋشىلاردىڭ مالىمەتىنشە، فەستيۆالگە اقمولا وبلىسىنىڭ تۇرعىندارىمەن قاتار، قازاقستاننىڭ باسقا وڭىرلەرىنەن كەلگەن تۋريستەر مەن شەتەلدىك قوناقتار دا قاتىسادى.
بيىل ەكىنشى رەت ۇيىمداستىرىلىپ وتىرعان «Flamingo Fest» فەستيۆالىن ءوڭىردىڭ مادەني-تۋريستىك برەندى رەتىندە ودان ءارى دامىتۋ جوسپارلانعان. ۇيىمداستىرۋشىلار شارا قورعالجىنعا تۋريستەر اعىنىن ارتتىرىپ، ونىڭ تابيعي جانە مادەني مۇراسىن كەڭىنەن تانىتۋعا ىقپال ەتەدى دەپ كۇتەدى.
