اقمولا وبلىسى، اربۋزينكا اۋىلى ىرگەسىندەگى سارقىراما وزەنى تاسىپ، جولدى شايىپ كەتتى. سالدارىنان ەكى جۇزگە جۋىق تۇرعىن سىرتقا شىعا الماي، و دۇنيەلىك بولعانداردى اقتىق ساپارعا قايىقپەن اتتاندىرۋعا ءماجبۇر، دەپ حابارلايدى "ادىرنا" ۇلتتىق پورتالى كتك تەلەارناسىنا سىلتەمە جاساپ.
اقمولا وبلىسىندا سارقىراما وزەنى ارناسىنان اسىپ، اۋىلدى "قىسپاققا الدى". تۇرعىنداردىڭ كۇن كوزىن كورىپ، سىرتقا شىعۋىنىڭ ءوزى مۇڭعا اينالعانداي. ءتىپتى، ومىردەن وزعان جاقىندارىن اۋىل زيراتىنا قاراي قايىقپەن اتتاندىرىپ، قىزىل سۋدىڭ ساباسىنا تۇسكەنىن كۇتىپ ءجۇر.
كتك تەلەارناسىنىڭ جازۋىنشا، اۋىلداعىلار ءمايىتتى ارعى بەتتە قالعان زيراتقا جەتكىزۋ ءۇشىن ەسكەكتى قايىققا سالىپ جىبەرگەنىمەن، كوپشىلىگى سىرتتا جانىن شۇبەرەككە تۇيۋمەن بولادى. ويتكەنى قالت-قۇلت ەتكەن ەسكى قايىقتىڭ ءوزى قىرىق جاماۋ. سارقىراما وزەنى جاناي وتەتىن اربۋزينكا اۋىلىنىڭ تۇرعىندارى جىل سايىن، كوكتەمدە، كورەتىن كۇنىمىز وسى دەپ وتىر. ءبىر اپتادان بەرى 30 وقۋشى دا كورشى اۋىلداعى مەكتەپكە جەتە الماعان. مۇندا مەديتسينا پۋنكتى دە جوق. ساندىقتاۋ اۋدانىنىڭ شەندىلەرى قولدان كەلەر قايران جوق، 200 مەترگە جەتەتىن كوپىر سالۋعا كەمىندە 1 جارىم ميلليارد تەڭگە قاجەت دەيدى. سوندىقتان، كۇن جىلىنىپ، سۋ اعىپ كەتكەنىن كۇتكەننەن باسقا امال جوق.
اۋدانداعى توتەنشە جاعدايلار ءبولىمىنىڭ باسشىسى بۇعان قاتىستى مىنانداي پىكىر ءبىلدىردى:
“اربۋزينكا اۋىلى بيىك جەردە تۇرعاندىقتان، ۇيلەرگە سۋ كىرگەن جوق. سارقىراما وزەنىندەگى مۇز ەرىگەن كەزدە جىلدا وسىنداي جاعداي ورىن الادى. تۇرعىندار ازىق-تۇلىكپەن قامتاماسىز ەتىلگەن. قازىر سۋ دەڭگەيى اقىرىن تومەندەپ كەلەدى. سوڭعى تاۋلىكتە اعىن سۋ 20 سانتيمەترگە ءتۇستى. قاجەت جاعدايدا قايىقپەن تاسىمالدايمىز”، – دەدى ساندىقتاۋ اۋدانى تجب باستىعى اسەت جانعوجين.
"ادىرنا" ۇلتتىق پورتالى
