2026 جىلعى 1 تامىز بەن 30 قىركۇيەك ارالىعىندا جالپىعا مىندەتتى ءبىلىم بەرۋ قورى اياسىندا الەۋمەتتىك وسال ساناتتاعى وقۋشىلارعا مەكتەپ فورماسىن، اياق كيىم مەن وقۋ قۇرالدارىن ساتىپ الۋعا قارجىلاي قولداۋ كورسەتىلەدى. بۇل تۋرالى وقۋ-اعارتۋ مينيسترلىگى مالىمدەدى، دەپ حابارلايدى "ادىرنا".
مينيسترلىكتىڭ مالىمەتىنشە، 2026–2027 وقۋ جىلى قارساڭىندا بۇل كومەككە شامامەن 450 مىڭ بالا يە بولادى. باعدارلامانى قارجىلاندىرۋ ءۇشىن جەرگىلىكتى بيۋدجەتتەردەن 23 ملرد تەڭگەگە جۋىق قاراجات قاراستىرىلعان.
ءبىر وقۋشىعا بەرىلەتىن تولەمنىڭ ەڭ تومەنگى مولشەرى – 50 851 تەڭگە. بۇل وتكەن جىلمەن سالىستىرعاندا 10 پايىزعا جوعارى. ال جەرگىلىكتى بيۋدجەت مۇمكىندىگىنە قاراي كەيبىر وڭىرلەردە كورسەتىلەتىن كومەك كولەمى بۇدان دا ارتۋى مۇمكىن.
قارجىلاي قولداۋ جەتىم بالالارعا، اتا-اناسىنىڭ قامقورلىعىنسىز قالعان وقۋشىلارعا، از قامتىلعان جانە اتاۋلى الەۋمەتتىك كومەك الاتىن وتباسىلاردىڭ بالالارىنا، سونداي-اق ومىرلىك قيىن جاعدايعا تاپ بولعان بالالارعا بەرىلەدى.
كومەكتى راسىمدەۋ ءۇشىن اتا-انالار نەمەسە زاڭدى وكىلدەر قاجەتتى قۇجاتتاردى بالاسى وقيتىن ءبىلىم بەرۋ ۇيىمىنا تاپسىرۋى قاجەت.
