قازاقستاندا مىندەتتى مەكتەپ فورماسىن الىپ تاستاۋ تۋرالى باستالعان پەتيتسيا ەكى اپتا ىشىندە 145 مىڭنان استام داۋىس جينادى، دەپ حابارلايدى "ادىرنا" ۇلتتىق پورتالى.
بۇل ۇكىمەت قاراۋىنا جولدانۋ ءۇشىن قاجەت 50 مىڭدىق مەجەدەن ءۇش ەسە كوپ.
پەتيتسيا اۆتورلارىنىڭ ايتۋىنشا، فورما ەنگىزۋ كەزىندە بيلىك وقۋشىلار اراسىنداعى تەڭدىكتى نىعايتۋ مەن ءتارتىپتى ساقتاۋ ماقساتىن كوزدەگەنىمەن بۇل ناتيجە بەرمەي وتىر. كەرىسىنشە، فورما وتباسىلارعا قارجىلىق اۋىرتپالىق تۇسىرەدى: ءبىرىنشى سىنىپ وقۋشىسىنا ارنالعان جيىنتىق 80–100 مىڭ تەڭگە تۇرادى، بۇل ورتاشا جالاقىنىڭ ۇشتەن بىرىنە تەڭ. كەي وتباسىلار نەسيە الۋعا نەمەسە نەگىزگى قاجەتتىلىكتەردەن باس تارتۋعا ءماجبۇر. سونىمەن بىرگە، مەكتەپتەردا باعا قىمبات، ال ساپاسى تومەن بولۋى مۇمكىن.
پەتيتسيادا فورما كيۋدىڭ وقۋ ۇلگەرىمىن ارتتىرۋعا نەمەسە بۋللينگتى ازايتۋعا اسەرى دالەلدەنبەگەنى ايتىلعان. سونداي-اق ءوزىن-ءوزى ءبىلدىرۋ ەركىندىگىنىڭ شەكتەلۋى، ساپاسىز ماتالاردىڭ جايسىزدىعى، فيزيكالىق بەلسەندىلىكتىڭ تومەندەۋى جانە مۇعالىمدەردىڭ كيىمدى باقىلاۋعا ۋاقىت جۇمساۋى دا پروبلەمالار قاتارىندا كورسەتىلگەن.
اۆتورلار مىندەتتى فورمادان باس تارتىپ، وقۋشىلارعا ىڭعايلى ءارى قولجەتىمدى كيىم كيۋگە مۇمكىندىك بەرەتىن، بىراق ىسكەرلىك ءستيلدى ساقتايتىن درەسس-كود ەنگىزۋدى ۇسىنادى. وسىلايشا فورماعا جۇمسالاتىن رەسۋرستاردى ءبىلىم ساپاسىن ارتتىرۋعا جانە ينكليۋزيۆتى ورتا قۇرۋعا باعىتتاۋ كەرەك دەيدى ولار.
ال وقۋ-اعارتۋ مينيسترلىگى مەكتەپ فورماسىنا قويىلاتىن تالاپتار زاڭمەن بەكىتىلگەنىن جانە بارلىق وقۋشىلار ءۇشىن مىندەتتى ەكەنىن مالىمدەدى. ۆەدومستۆو بىرىڭعاي فورما تەڭدىك پەن ءتارتىپتى قامتاماسىز ەتەدى دەپ ەسەپتەيدى.
سونىمەن قاتار مينيسترلىككە بۇل پەتيتسيا رەسمي تۇردە تۇسپەگەنى ايتىلدى.
