بالالارعا العاشقى قوڭىراۋ جاقىنداعان سايىن، اتا-انالار مەكتەپ فورماسىن قالاي الامىز دەپ الاڭداۋدا. باعا شارىقتاعانى سونشالىق، كوپ بالالى وتباسىلار 3-4 بالاعا بىردەن قالاي تولىق جابدىق الارىن بىلمەي وتىر. وڭعار قابدەن ءوز facebook پاراقشاسىندا وسى تاقىرىپتا وزەكتى پىكىرىن ءبىلدىردى.
ول ءوز جازباسىندا بازارداعى كيىمدەردىڭ باعاسى وتە قىمبات ەكەنىن، قول جەتىمدى كيىمدەر قىرعىزستاننان شىققان ءونىم ەكەنىن العا تارتتى.
بازارعا بارسام مەكتەپكە بالالارىن كيىندىرۋگە اعىلعان حالىق. باعا ۇشىپ تۇر. بايقاعانىم جۇرتتىڭ الاتىنى قول جەتىمدى قىرعىزدان كەلەتىن كيىمدەر ەكەن. تۇركيادان كەلگەن كوستيۋم-شالباردىڭ 50 مىڭنان تومەنى جوق. ودان دا ول اقشاعا قىرعىزدىق كوستيۋم شالبداردىڭ ەكەۋىن الماي ما؟
پاۆلوداردا بۇرىن ارتۋر، كۆازار مەن يارماركا دۇركىرەپ تۇرۋشى ەدى. قازىر الماتىلىق باعا مەن ارزان كيىمدەر جەلىسى ولاردى نارىقتان ىسىرىپ تاستاپتى. الماتىلىق ارزان دۇكەندەرىنىڭ تاۋارىنىڭ دەنى قىرعىز اعايىندىكى. تاپقانى تاماقتان اسپايتىن حالىق ارينە ارزانىنا جۇگىرەدى.
سوندا وزىمىزدەن ەشتەڭە شىقپاي ما؟ جەڭگەمنەن سۇراسام باسقاسىن ايتپاعاندا كادىمگى اق ءمارلى بار عوي سونىمەن قازاقستاندى وزبەكتەر قامتاماسىز ەتىپ تۇر دەيدى.
جەتىسايدا ماقتا ەگەمىز. ونى ەگۋ، باپتاپ، ءوسىرۋ وتە اۋىر جۇمىس. سونى ديحاندار بولمايتىن تيىن-تەبەنگە ساتادى عوي. ەسىل ەڭبەك.
اۋىلداردا مالدىڭ تەرىسى مەن ءجۇنى كورىنگەن سايدا شاشىلىپ جاتىر. ەشكىم المايدى.
قاپتاتىپ مەشىت سالا بەرگەنشە تىم قۇرىسا تەرى-ءجۇن وڭدەيتىن زاۋىت سالعاندا عوي. ءوز كيىمىمىزدى ءوزىمىز تىگىپ، جۇمىسسىزدىق ماسەلەسىن دە شەشەتىن ەدىك. ايتپەسە، قىتايمەن، قىرعىزبەن شەكارانى جاپساق جالاڭبۇت قالعانداي ەكەنبىز. زاۋىت-فابريكا سالعاندا دا جۇمىس ىستەيتىنىن سالۋ كەرەك.
ايتپەسە، نازارباەۆ كەلىپ لەنتاسىن قيىپ، ەرتەڭىندە جابىلىپ قالعان زاۋىت-فابريكالاردى حالىق ساناپ تۇرىپ ايتا الادى،- دەپ جازدى ول.
”ادىرنا” ۇلتتىق پورتالى
