اتىراۋدا تامىز ايىندا جايىق وزەنىنە باتىپ كەتكەن جاسوسپىرىمدەردىڭ ءبىرىنىڭ اناسى قالادا كولىك قوزعالىسىن شەكتەۋگە تىرىستى. بۇل تۋرالى الەۋمەتتىك جەلىدە بەينەجازبا تارادى، دەپ حابارلايدى “ادىرنا” ۇلتتىق پورتالى.
اتىراۋ وبلىستىق پوليتسيا دەپارتامەنتىنىڭ ءباسپاسوز قىزمەتى تومەندەگىدەي تۇسىنىك بەرەدى.
«بۇگىن، 11 قازان كۇنى ساعات 9:00 شاماسىندا قالا تۇرعىنى وبلىستىق پروكۋراتۋرا تۇسىنداعى جول قيىلىسىندا كولىك قوزعالىسىن شەكتەمەك بولدى. ايەل ادام قۇقىق بۇزۋشىلىقتىڭ الدىن الۋعا بارعان ءتارتىپ ساقشىلارىنىڭ زاڭدى تالابىنا باعىنباي كەدەرگى كەلتىردى. اتالعان ازاماتشا – تامىز ايىندا جايىق وزەنىنە دوستارىمەن بارىپ، باتىپ كەتكەن ءجاسوسپىرىمنىڭ اناسى. پوليتسيا بۇل دەرەك بويىنشا تامىز ايىنان بەرى قىلمىستىق ءىستى تەرگەۋدى جۇرگىزىپ جاتىر. تەرگەۋدىڭ كەشەندى ءىس-ارەكەتتەرى جان-جاقتى جۇرگىزىلىپ، جابىرلەنۋشىگە ءتۇسىندىرىلدى. قىلمىستىق ءىستى تەرگەۋ بارىسى دەپارتامەنت باسشىلىعىنىڭ تىكەلەي باقىلاۋىنا الىندى»، - دەپ حابارلادى دەپارتامەنتتىڭ ءباسپاسوز قىزمەتى.
