«مەن وقىعان 30 كىتاپ» ءى رەسپۋبليكالىق بايقاۋىنىڭ جەڭىمپازدارى ماراپاتتالدى. ماراپاتتاۋ راسىمىنە اۋدان اكىمى اسلانبەك احمەتوللاۇلى سارقۇلوۆ قاتىسىپ، كىتاپتى سەرىك ەتكەن جاس بۋىنعا ريزاشىلىعىن ءبىلدىردى.
اۋدان باسشىسى ءوز سوزىندە بۇل بايقاۋدىڭ باستى جەتىستىگى جاس ۇرپاقتىڭ كىتاپقا دەگەن ىقىلاسىن ارتتىرىپ، وقىرماندىق مادەنيەتىن قالىپتاستىرۋدا جاتقانىن اتاپ ءوتتى. سونداي-اق ءبىلىم بايگەسىنە قاتىسقان ءاربىر وقۋشى مەن ولاردىڭ جانىنان تابىلىپ، باعىت-باعدار بەرگەن ۇستازدار مەن جەتەكشىلەرگە العىسىن جەتكىزدى.
رۋحاني دوداعا قاتىسقان ءاربىر جاس – ءوز الدىنا ءبىر الەم. ءبىرى كلاسسيكالىق شىعارمالاردىڭ تەرەڭىنە بويلاسا، ءبىرى زاماناۋي ادەبيەتتىڭ تىنىسىن تانىدى. ءبىرى كەيىپكەر مىنەزىن سارالاپ، ءبىرى شىعارما يدەياسىن ومىرلىك ۇستانىمىمەن ساباقتاستىردى. ءسويتىپ، وتىز كىتاپتىڭ ءار پاراعى جاس وقىرماننىڭ دۇنيەتانىمىنا وزىندىك ءىز قالدىردى.
بايقاۋ قورىتىندىسى بويىنشا باس جۇلدەلى ءى ورىنعا باتىس قازاقستان وبلىسى، كازتالوۆ اۋدانى، قاراوزەن مەكتەپ-ليتسەيىنىڭ 10-سىنىپ وقۋشىسى حايرۋللا جانسايا بايبولاتقىزى لايىق دەپ تانىلدى. جەڭىمپاز ءى ميلليون تەڭگە سەرتيفيكاتقا يە بولدى. ءىى ورىندى جانە 700 مىڭ تەڭگە سەرتيفيكاتتى باتىس قازاقستان وبلىسى، اقجايىق اۋدانى، و.يساەۆ اتىنداعى جالپى ورتا ءبىلىم بەرەتىن مەكتەپتىڭ 9-سىنىپ وقۋشىسى بەرجانوۆا ايكوركەم سىرىمبەتقىزى يەلەندى. ال ءىىى ورىن جانە 500 مىڭ تەڭگەلىك سەرتيفيكات كازتالوۆ اۋدانىنىڭ قوس بىردەي وكىلى – قاراوزەن مەكتەپ-ليتسەيىنىڭ 9-سىنىپ وقۋشىسى تلەميسوۆا رامينا ارمانقىزى مەن كازتالوۆ مەكتەپ-ليتسەيىنىڭ 9-سىنىپ وقۋشىسى تىنىبەكوۆا نۇريلا بەكبولاتقىزىنا بۇيىردى.
بۇدان بولەك، بايقاۋدا كىتاپقا قۇشتارلىعىن، ىزدەنىسىن جانە دارا قابىلەتىن تانىتقان وقۋشىلارعا ارنايى نوميناتسيالار مەن سىيلىقتار تابىستالدى. قادىر مىرزا ءالي اتىنداعى سىيلىققا اتىراۋ وبلىسى، جىلىوي اۋدانى، قۇلسارى قالاسىنداعى №20 جالپى ورتا ءبىلىم بەرەتىن مەكتەپتىڭ 10-سىنىپ وقۋشىسى لاۋادين ديانا يسلامقىزى، جۇبان مولداعاليەۆ اتىنداعى سىيلىققا باتىس قازاقستان وبلىسى، تەرەكتى اۋدانى، ۇزىنكول ورتا مەكتەبىنىڭ 10-سىنىپ وقۋشىسى جۋنۋسوۆا اياجان جاسۇلانقىزى، ال حامزا ەسەنجانوۆ اتىنداعى سىيلىققا كازتالوۆ اۋدانى، ا.حۇسايىنوۆ اتىنداعى جالپى ورتا ءبىلىم بەرەتىن مەكتەپتىڭ 8-سىنىپ وقۋشىسى امانگەلدى سەزىم سالاۋاتقىزى يە بولدى. ارنايى جۇلدە يەگەرلەرىنە جەكە كاسىپكەرلەر نۇرگۇل اشيحوۆا، ابزال سراليەۆ، دارحان اياباليەۆ قولداۋ كورسەتتى.
سونداي-اق 100 مىڭ تەڭگەلىك سىيلىققا يە بولعان وقۋشىلار قاتارىندا ماڭعىستاۋ وبلىسىنىڭ بەينەۋ اۋدانىنان بەردىبەك اقىلبەك ادىلبەكۇلى، اقتاۋ قالاسىنان بولات ايارۋ قاناتقىزى، قاراعاندى وبلىسى شەت اۋدانىنان مەيىرجان كاۋسار باحىتجانقىزى، الماتى وبلىسى قاراساي اۋدانىنان لاشىنباي اليانا دىنمۇحامەدقىزى، جامبىل وبلىسى تۇرار رىسقۇلوۆ اۋدانىنان ورىنبەك ەركەناز نۇردوسقىزى، تۇركىستان وبلىسى سارىاعاش اۋدانىنان باكىرجان اقسەلەۋ قالدىبايقىزى، اقتوبە قالاسىنان ايمۇرات اقنۇر ەركەبۇلانقىزى، اتىراۋ وبلىسى يندەر اۋدانىنان ديۋسەمباي ءىنجۋ بەيبىتقىزى، باتىس قازاقستان وبلىسى سىرىم اۋدانىنان باترعالي ايارۋ نۇربولقىزى، كازتالوۆ اۋدانىنان راحيموۆا ايشا مەدەتقىزى جانە شىڭعىرلاۋ اۋدانىنان جاۋمباي ايزەرە سالاماتقىزى ماراپاتتالدى. ولارعا «ىزدەنىمپاز وقىرمان»، «زەرەك وقىرمان»، «زەيىندى وقىرمان»، «پاراساتتى وقىرمان»، «ىنتالى وقىرمان»، «زەردەلى وقىرمان»، «تالاپتى وقىرمان»، «زياتكەر وقىرمان»، ء«بىلىمپاز وقىرمان»، «تالعامپاز وقىرمان»، «ورەلى وقىرمان» سىندى اتاۋلاردىڭ بەرىلۋى دە بايقاۋدىڭ ءمان-ماعىناسىن ايشىقتاي ءتۇستى.
«مەن وقىعان 30 كىتاپ» – بەلگىلى ءبىر مەرزىمدە وتەتىن بايقاۋدان گورى، جاس ۇرپاقتىڭ كىتاپپەن تۇراقتى بايلانىسىن قالىپتاستىرۋعا باعىتتالعان تاعىلىمدى باستاما. كازتالوۆ تورىندە وتكەن ماراپاتتاۋ ءراسىمى وسىنداي رۋحاني ساباقتاستىقتىڭ جارقىن كورىنىسىنە اينالدى. ەلدىڭ ءار قيىرىنان كەلگەن جاس وقىرماندار ءبىر-بىرىمەن تاجىريبە الماسىپ قانا قويماي، كىتاپتىڭ ادام ومىرىندەگى ورنىن تاعى ءبىر مارتە سەزىندى.
جەڭىس – بۇگىنگى ماراپات. ال كىتاپتان العان ءبىلىم مەن تاعىلىم – ءومىر بويعى ەنشى.
