قازاقستاندا ەكونوميكانىڭ ءوسۋى جانە شيكىزاتتىق ەمەس سالالاردىڭ كۇشەيۋى بايقالادى. بۇل تۋرالى ۇكىمەت وتىرىسىندا پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعارين مالىمدەدى، دەپ حابارلايدى «ادىرنا» ءتىلشىسى.
ونىڭ ايتۋىنشا، سىرتقى ەكونوميكالىق جاعدايدىڭ ناشارلاۋىنا قاراماستان، قازاقستان ەكونوميكاسى ساپالى ءوسۋدى كورسەتىپ وتىر.
2025 جىلدىڭ قورىتىندىسى بويىنشا ەكونوميكانىڭ ءوسۋى 6,5%-دى قۇراعان، بۇل سوڭعى جىلدارداعى ەڭ جوعارى كورسەتكىشتەردىڭ ءبىرى بولدى.
«وسى جىلى وڭ ديناميكا ساقتالۋدا. قاڭتار-مامىر ايلارىنىڭ قورىتىندىسى بويىنشا ەكونوميكا 3,7%-عا ءوستى. ەكونوميكالىق ءوسىم شيكىزاتقا جاتپايتىن سەكتور سالالارىنداعى بەلسەندىلىكتىڭ ارتۋى ەسەبىنەن قامتاماسىز ەتىلىپ جاتقانى ەرەكشە ماڭىزدى. مۇناي ءوندىرۋدى ەسەپكە الماعاندا ءوسىم 5%-دان اسادى، بۇل ەكونوميكا قۇرىلىمىنىڭ بىرتىندەپ وزگەرۋىن جانە شيكىزاتقا جاتپايتىن سالالار ءرولىنىڭ كۇشەيۋىن كورسەتەدى»،— دەپ اتاپ ءوتتى سەرىك جۇمانعارين.
سونداي-اق ول پرەزيدەنتتىڭ ەكونوميكالىق ءوسۋدىڭ جاڭا مودەلىنە كوشۋ جونىندەگى تاپسىرماسىن ورىنداۋ بويىنشا قابىلدانىپ جاتقان شارالار تۋرالى باياندادى. مينيستر ۇكىمەت جۇرگىزىپ جاتقان جۇمىس ازاماتتاردىڭ ءال-اۋقاتىن ارتتىرۋعا، ەكونوميكانى تۇراقتى دامىتۋعا جانە ونىڭ باسەكەگە قابىلەتتىلىگىن نىعايتۋعا باعىتتالعانىن اتاپ ءوتتى.
«حالىقتىڭ ناقتى تابىسىن ارتتىرۋ ۇكىمەت ءۇشىن نەگىزگى باسىمدىق بولىپ سانالادى. ول ءۇشىن ۇكىمەت ۇلتتىق بانكپەن جانە قارجى نارىعىن رەتتەۋ جانە دامىتۋ اگەنتتىگىمەن بىرلەسىپ ماكروەكونوميكالىق تۇراقتاندىرۋ جانە حالىقتىڭ ءال-اۋقاتىن ارتتىرۋ جونىندەگى 2026 – 2028 جىلدارعا ارنالعان باعدارلامانى جۇزەگە اسىرۋدا. سونداي-اق بيىل ءبىز حالىقتىڭ تابىسىن ارتتىرۋ بويىنشا جەكە باعدارلاما قابىلدادىق»، — دەدى سەرىك جۇمانعارين.
ەلىمىزدە جالاقىنى ارتتىرۋ، ساپالى جۇمىس ورىندارىن قۇرۋ، بورىشتىق جۇكتەمەنى ازايتۋ جانە كاسىپكەرلىكتى دامىتۋدى ىنتالاندىرۋ بويىنشا شارالار قابىلداناتىنى دا اتاپ ءوتىلدى.
