Qazaqstanda ekonomikanyŋ ösuı jäne şikızattyq emes salalardyŋ küşeiuı baiqalady. Būl turaly Ükımet otyrysynda Premer-ministrdıŋ orynbasary – ūlttyq ekonomika ministrı Serık Jūmanǧarin mälımdedı, dep habarlaidy «Adyrna» tılşısı.
Onyŋ aituynşa, syrtqy ekonomikalyq jaǧdaidyŋ naşarlauyna qaramastan, Qazaqstan ekonomikasy sapaly ösudı körsetıp otyr.
2025 jyldyŋ qorytyndysy boiynşa ekonomikanyŋ ösuı 6,5%-dy qūraǧan, būl soŋǧy jyldardaǧy eŋ joǧary körsetkışterdıŋ bırı boldy.
«Osy jyly oŋ dinamika saqtaluda. Qaŋtar-mamyr ailarynyŋ qorytyndysy boiynşa ekonomika 3,7%-ǧa östı. Ekonomikalyq ösım şikızatqa jatpaityn sektor salalaryndaǧy belsendılıktıŋ artuy esebınen qamtamasyz etılıp jatqany erekşe maŋyzdy. Mūnai öndırudı esepke almaǧanda ösım 5%-dan asady, būl ekonomika qūrylymynyŋ bırtındep özgeruın jäne şikızatqa jatpaityn salalar rölınıŋ küşeiuın körsetedı»,— dep atap öttı Serık Jūmanǧarin.
Sondai-aq ol prezidenttıŋ ekonomikalyq ösudıŋ jaŋa modelıne köşu jönındegı tapsyrmasyn oryndau boiynşa qabyldanyp jatqan şaralar turaly baiandady. Ministr Ükımet jürgızıp jatqan jūmys azamattardyŋ äl-auqatyn arttyruǧa, ekonomikany tūraqty damytuǧa jäne onyŋ bäsekege qabılettılıgın nyǧaituǧa baǧyttalǧanyn atap öttı.
«Halyqtyŋ naqty tabysyn arttyru Ükımet üşın negızgı basymdyq bolyp sanalady. Ol üşın Ükımet Ūlttyq Bankpen jäne Qarjy naryǧyn retteu jäne damytu agenttıgımen bırlesıp Makroekonomikalyq tūraqtandyru jäne halyqtyŋ äl-auqatyn arttyru jönındegı 2026 – 2028 jyldarǧa arnalǧan baǧdarlamany jüzege asyruda. Sondai-aq biyl bız Halyqtyŋ tabysyn arttyru boiynşa jeke baǧdarlama qabyldadyq», — dedı Serık Jūmanǧarin.
Elımızde jalaqyny arttyru, sapaly jūmys oryndaryn qūru, boryştyq jüktemenı azaitu jäne käsıpkerlıktı damytudy yntalandyru boiynşa şaralar qabyldanatyny da atap ötıldı.
