قازىرگى تاڭدا ەكونوميكالىق وداققا تۇسەتىن كەدەندىك باجدىڭ 6,955%-ىن قازاقستان، 1,9%ىن قىرعىزستان، 1,22%ىن ارمەنيا، 4,86%-ىن بەلارۋس، 85,065%-ىن رەسەي الىپ وتىر. ەلىمىز وسى كەدەندىك باج سالىعىن 6,955%دان جوعارى كوتەرە مە دەگەن سۇراققا پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعارين جاۋاپ بەردى، دەپ حابارلايدى “ادىرنا”.
سەرىك جۇمانعاريننىڭ ايتۋىنشا، قازىر كەدەندىك باج سالىعى سومالارىن ءبولۋ كەزىندە قازاقستاننىڭ ۇلەسىن قايتا قاراۋ مۇمكىن ەمەس. سەبەبى ول بۇل ماسەلە وڭ شەشىلۋى ءۇشىن رەسەي مەن بەلارۋستىڭ كەلىسىمى قاجەت ەكەنىن ەسكەرتتى.
«ول ءۇشىن كونسەنسۋس كەرەك. ءبارى كەلىسۋى ءتيىس. ال قازىر رەسەي مەن بەلارۋستىڭ ستاتيستيكاسى جابىق. ەسەپتەۋ وتە قيىن. ءبىز دە ءبىراز ۇسىنىستاردى ەنگىزدىك. بۇكىل دەڭگەيدە. جوعارى دەڭگەيدە، ءتىپتى پرەزيدەنتتەر دەڭگەيىندە كوتەردىك. ول جۇمىستى ارينە، جالعاستىرامىز. بىراق قازىر كونسەنسۋسقا جەتۋ وتە قيىن، مۇمكىن ەمەس دەۋگە بولادى.
ءبىزدىڭ دە ءوز ەسەبىمىز بار. ول ادىستەمەگە بايلانىستى. ارينە، ەسەپ بولسا قازاقستان پايدا كورەدى. قازىر 6,955 پايىز. 7 پايىز دەپ ەسەپتەۋگە بولمايدى. ناقتى ايتۋ كەرەك. جالپى ايتقاندا، كەيبىر ادىستەمەلەردە 7,3 پايىز قىلىپ جىبەرەدى. بۇدان دا كوبىرەك بولادى. كەيبىر ادىستەمەلەردە 7,5 پايىز بولدى. بۇل شوتقا بايلانىستى. ولاردىڭ دا ءوز قارسى ۇسىنىستارى بار، – دەيدى جۇمانعارين.
