كوكشەتاۋدا ەلىمىزدىڭ تۇكپىر-تۇكپىرىنەن كەلگەن ساۋلەتشىلەردى، ۋربانيستەردى، مەملەكەتتىك ورگانداردىڭ وكىلدەرى مەن ساراپشىلاردى بىرىكتىرگەن رەسپۋبليكالىق Aqmola Urban Forum فورۋمى ءوتىپ جاتىر. قاسىم-جومارت توقاەۆتىڭ تاپسىرماسىمەن ۇيىمداستىرىلعان بۇل الاڭدا رەنوۆاتسيا تاجىريبەسىن كەڭىنەن ەنگىزۋ، زاماناۋي ۋربانيستيكا جانە جايلى قالالىق ورتا قالىپتاستىرۋ ماسەلەلەرى تالقىلانۋدا، دەپ حابارلايدى وڭىرلىك كوممۋنيكاتسيالار قىزمەتى.
پلەنارلىق وتىرىستى اشقان قازاقستان رەسپۋبليكاسى ونەركاسىپ جانە قۇرىلىس ۆيتسە-ءمينيسترى قۋاندىق قاجكەنوۆ بارلىق وڭىرلەر ءۇشىن اقمولا وبلىسىنىڭ قۇرىلىس نىساندارىن رەنوۆاتسيالاۋ جانە ەنەرگيا ءتيىمدى تەحنولوگيالاردى ەنگىزۋ تاجىريبەسى ەرەكشە قىزىعۋشىلىق تۋدىراتىنىن اتاپ ءوتتى.
ء“بىز بۇل تاجىريبەنى تەك تەوريالىق تۇرعىدان عانا ەمەس، پراكتيكالىق جاعىنان دا كورسەتۋدى كوزدەپ وتىرمىز. وڭىرلەردەن كەلگەن ساۋلەت باسقارمالارىنىڭ وكىلدەرى مەن سالالىق بولىمشەلەردىڭ باسشىلارى ىسكە اسىرىلعان جوبالارمەن تىكەلەي تانىسىپ، كوكشەتاۋدىڭ ۇزدىك تاجىريبەلەرىن ءوز وڭىرلەرىندە قولدانا الادى. ءبىز بۇل تاجىريبەنى رەسپۋبليكا كولەمىندە كەڭىنەن تاراتۋدى جوسپارلاپ وتىرمىز”، – دەدى قۋاندىق قاجكەنوۆ.
فورۋمدا ۇسىنىلعان تاجىريبەنىڭ ەڭ ماڭىزدى باعىتتارىنىڭ ءبىرى تۇرعىن ءۇي رەنوۆاتسياسى باعدارلاماسى بولدى. 2024 جىلدىڭ قاراشا ايىنان بەرى وبلىستا 23 اپاتتى تۇرعىن ءۇي ءسۇرىلىپ، ولاردىڭ ورنىنا زاماناۋي تۇرعىن ءۇي كەشەندەرى بوي كوتەردى. سونىڭ ناتيجەسىندە جۇزدەگەن وتباسى تۇرعىن ءۇي جاعدايىن جاقسارتۋعا مۇمكىندىك الدى. بيىل بۇل جۇمىس جالعاسىن تابادى. بەكىتىلگەن جوبالار اياسىندا تاعى شامامەن 1200 تۇرعىندى جاڭا باسپانامەن قامتاماسىز ەتۋ جوسپارلانعان.
ۇيىمداستىرۋشىلاردىڭ ايتۋىنشا، اقمولا وبلىسىنىڭ ەكونوميكانىڭ ءتۇرلى سالالارىنداعى جەتىستىكتەرى بۇگىندە رەسپۋبليكالىق دەڭگەيدە ۇلكەن قىزىعۋشىلىق تۋدىرىپ وتىر.
اقمولا وبلىسىنىڭ اكىمى مارات احمەتجانوۆ اتاپ وتكەندەي، قالالىق ورتانى دامىتۋ مىقتى ەكونوميكا مەن جاڭا ءوسۋ نۇكتەلەرىن قالىپتاستىرۋسىز مۇمكىن ەمەس.
“سوڭعى جىلدارى ءوڭىر ەكونوميكاسى تۇراقتى ءوسىم كورسەتىپ، قوماقتى ينۆەستيتسيالار تارتۋدا. تەك وتكەن جىلدىڭ وزىندە نەگىزگى كاپيتالعا سالىنعان ينۆەستيتسيالار كولەمى 900 ملرد تەڭگەدەن استى. ونىڭ باسىم بولىگىن جەكە سەكتور قامتاماسىز ەتتى. بيىلعى جىلدىڭ العاشقى توقسانىندا جەكە ينۆەستيتسيالار كولەمى ەكى ەسەگە ءوسىپ، جالپى ينۆەستيتسيالاردىڭ 92 پايىزىن قۇرادى”، – دەدى وبلىس اكىمى.
ەكونوميكالىق تۇراقتىلىق وڭىردە اۋقىمدى ينفراقۇرىلىمدىق جانە الەۋمەتتىك جوبالاردى جۇزەگە اسىرۋعا مۇمكىندىك بەرىپ وتىر. ماسەلەن، كوكشەتاۋدا نەبارى 11 ايدىڭ ىشىندە سپورتشىلاردى وليمپيادالىق سپورتتىڭ 15 ءتۇرى بويىنشا دايارلاۋعا ارنالعان كوپفۋنكتسيونالدى «كوكشە ارەنا» سپورت كەشەنى سالىندى. ال زەرەندى اۋدانىندا بالالارعا ارنالعان سپورتتىق-جاتتىعۋ ورتالىعى بار بولعانى بەس ايدا بوي كوتەردى. مۇنداي قۇرىلىس قارقىنى ەلىمىزدە تەڭدەسى جوق كورسەتكىش سانالادى. ايتا كەتۋ كەرەك، بۇل نىسان مەملەكەتكە قايتارىلعان اكتيۆتەر ەسەبىنەن سالىنعان.
“استانا قالاسىمەن بىرلەسىپ «Astana Invest» اۋقىمدى جوباسىن ىسكە قوستىق. ونىڭ اياسىندا ينۆەستورلارعا جان-جاقتى قولداۋ كورسەتىپ، ينۆەستيتسيالىق جوبالاردى سۇيەمەلدەيتىن ماماندار جۇمىس ىستەيدى. بيىل كۇزدە جاڭا كىرپىش زاۋىتىن ىسكە قوسۋ جوسپارلانىپ وتىر. سونىمەن قاتار تراكتور شىعاراتىن كاسىپورىننىڭ قۇرىلىسى باستالادى. جالپى، ۇكىمەت قاۋلىسىمەن وبلىستا ارنايى يندۋستريالىق ايماق قۇرىلدى. ءبىزدىڭ باستى مىندەتىمىز – ءونىمدى ەل ىشىندە تەرەڭ وڭدەۋدى قامتاماسىز ەتۋ، جاڭا جۇمىس ورىندارىن اشۋ جانە ءوڭىردىڭ تۇراقتى ەكونوميكالىق دامۋىنا نەگىز بولاتىن زاماناۋي ونەركاسىپتىك بازانى قالىپتاستىرۋ”، – دەدى مارات احمەتجانوۆ.
ايتا كەتۋ كەرەك، اقمولا وبلىسى اۋىل شارۋاشىلىعى سالاسىندا دا ەلىمىزدىڭ جەتەكشى وڭىرلەرىنىڭ ءبىرى سانالادى. وتكەن جىلى ءوڭىر ديقاندارى 7,6 ملن توننا استىق جيناپ، تاريحي رەكوردتىق ناتيجەلەردىڭ بىرىنە قول جەتكىزدى.
جىل سايىن مەملەكەت ءوڭىردىڭ اگروونەركاسىپتىك كەشەنىن قولداۋعا شامامەن ءبىر تريلليون تەڭگە باعىتتايدى. بۇل قارجى ناقتى ناتيجەلەرگە جول اشۋدا. وتكەن جىلى اگروونەركاسىپتىك كەشەن قىزمەتكەرلەرىنىڭ جالاقىسى 27 پايىزعا وسسە، بيىل اۋىل شارۋاشىلىعى ەڭبەككەرلەرىنىڭ تابىسىن تاعى 50 پايىزعا ارتتىرۋ مىندەتى قويىلىپ وتىر.
