سۋرەت: advantour.com
بۇگىن، 18 قاراشادا قۇرىلتاي دەپۋتاتتارى 2027–2029 جىلدارعا ارنالعان «رەسپۋبليكالىق بيۋدجەت تۋرالى» زاڭدى قابىلدادى. قۇجاتتا ەڭ تومەنگى جالاقىنى كوتەرۋگە قاراجات ءبولۋ كوزدەلگەن، دەپ حابارلايدى «ادىرنا» ءتىلشىسى.
«زاڭ جوباسىن قۇرىلتايدا قاراۋ بارىسىندا دەپۋتاتتار مەملەكەت باسشىسىنىڭ 2026 جىلعى 28 قازانداعى جولداۋىندا بەرگەن تاپسىرمالارىن ىسكە اسىرۋعا باعىتتالعان تۇزەتۋلەردى قولدادى. سوعان سايكەس، 2027 جىلعى بيۋدجەت شىعىستارىنا قوسىمشا 75,9 ملرد تەڭگە قاراستىرىلدى. بۇل قاراجات ەڭ تومەنگى جالاقى مولشەرىن 85 مىڭ تەڭگەدەن 110 مىڭ تەڭگەگە دەيىن ارتتىرۋعا باعىتتالادى»، – دەلىنگەن زاڭ جوباسىنىڭ تۇسىندىرمەسىندە.
سونىمەن قاتار العاشقى مەديتسينالىق-سانيتاريالىق كومەك ۇيىمدارىنىڭ قىزمەتكەرلەرىنىڭ جالاقىسىن كوتەرۋگە 20 ملرد تەڭگە ءبولۋ جوسپارلانعان.
قوسىمشا قارجىلاندىرۋ كوزدەرى رەتىندە پرەزيدەنت پەن ۇكىمەت رەزەرۆتەرى، سونداي-اق مەملەكەتتىك بورىشقا قىزمەت كورسەتۋ شىعىندارىن قىسقارتۋ قاراستىرىلعان.
ەڭ تومەنگى جالاقى سوڭعى رەت 2024 جىلعى 1 قاڭتاردا كوتەرىلگەن ەدى. سول كەزدە ونىڭ مولشەرى 70 مىڭ تەڭگەدەن 85 مىڭ تەڭگەگە دەيىن وسكەن بولاتىن.
