سىر ءوڭىرى ونەر شەبەرلەرىنىڭ ەۋروپاداعى گاسترولدىك ساپارى اياسىندا ليۋكسەمبۋرگ ۇلى گەرتسوگتىگىندە قىزىلوردا وبلىستىق فيلارمونياسىنىڭ كونتسەرتى ءوتتى. «Shanyraq Fest Luxembourg» مادەني باستاماسى شەڭبەرىندە ۇيىمداستىرىلعان كەشتە قازاق حالقىنىڭ باي مۋزىكالىق جانە فولكلورلىق مۇراسى كورەرمەن نازارىنا ۇسىنىلدى.
مادەني ءىس-شارا قازاقستان رەسپۋبليكاسىنىڭ بەلگيا كورولدىگى مەن ليۋكسەمبۋرگ ۇلى گەرتسوگتىگىندەگى ەلشىلىگى، وبلىس اكىمى مۇرات نالقوجاۇلىنىڭ جانە ERG قولداۋىمەن ۇيىمداستىرىلدى.
ونەر ساپارى وسىدان بىرنەشە اي بۇرىن نۇرلىبەك ماشبەكۇلىنىڭ باستاماسىمەن جوسپارلانىپ، قاراجاتى شەشىلگەن بولاتىن.
كونتسەرتكە ليۋكسەمبۋرگتىڭ مەملەكەتتىك مەكەمەلەرىنىڭ وكىلدەرى، ديپلوماتيالىق كورپۋس مۇشەلەرى، كاسىپكەرلەر، مادەنيەت سالاسىنىڭ قىزمەتكەرلەرى، سونداي-اق وسى ەلدە تۇراتىن قازاقستاندىقتار مەن ستۋدەنت جاستار قاتىستى.
كەشتە قازاقستاننىڭ ليۋكسەمبۋرگتەگى ەلشىسى رومان ۆاسيلەنكو قۇتتىقتاۋ ءسوز سويلەپ، مادەنيەت پەن ونەردىڭ حالىقتاردى جاقىنداستىراتىن ماڭىزدى رۋحاني قۇندىلىق ەكەنىن اتاپ ءوتتى. سونىمەن قاتار مۇنداي باستامالار مەملەكەتتەر اراسىنداعى دوستىق قارىم-قاتىناستى نىعايتىپ، حالىقتاردىڭ ءبىر-ءبىرىنىڭ تاريحى مەن ءداستۇرىن تەرەڭىرەك تانۋىنا ىقپال ەتەتىنىن جەتكىزدى.
مادەنيەت سالاسىنىڭ ۇزدىگى ءازيزا ىزدىقۇلوۆا رەجيسسەرلىك ەتكەن كونتسەرتتىك باعدارلامادا سىر ءوڭىرىنىڭ باي مۋزىكالىق مۇراسى كەڭىنەن ناسيحاتتالىپ، ۇلتتىق فولكلور، كۇي ونەرى مەن جىراۋلىق ءداستۇر كورەرمەن نازارىنا ۇسىنىلدى. ونەرپازدار ورىنداۋىنداعى شىعارمالار ارقىلى ۇلى دالانىڭ رۋحى مەن قازاق حالقىنىڭ مادەني ەرەكشەلىگى شەتەلدىك كورەرمەنگە كەڭىنەن تانىستىرىلدى.
كەش قورىتىندىسىندا ونەرپازدار «اتامەكەن» ءانىن ورىنداپ، قازاق مادەني كەشىنىڭ اسەرلى فينالىنا اينالدىردى.
