بۇگىن وبلىس اكىمى مۇرات ەرگەشباەۆتىڭ توراعالىعىمەن ايماقتاعى قوعامدىق-ساياسي احۋال، قوعامدىق قاۋىپسىزدىكتى قامتاماسىز ەتۋ ماسەلەلەرى تالقىلانعان ءماجىلىس ءوتتى.
وعان قۇقىق قورعاۋ ورگاندارىنىڭ ءبىرىنشى باسشىلارى، وبلىس اكىمىنىڭ ورىنباسارلارى، باسقارما باسشىلارى، ءبىلىم بەرۋ ۇيىمدارىنىڭ ديرەكتورلارى مەن اتا-انالار كوميتەتتەرىنىڭ توراعالارى قاتىستى.
مەملەكەت باسشىسى بۇگىنگى جولداۋىندا قوعامداعى بىرلىك پەن كەلىسىمدى نىعايتىپ، تالاپ پەن تارتىپكە باسىمدىق بەرۋدىڭ ماڭىزىن اتاپ ءوتتى.
«جۇمىستى ويداعىداي ورىنداۋ ءۇشىن، ەڭ الدىمەن، بۇكىل قوعامىمىز تاتۋ بولۋى كەرەك. بىرلىك پەن كەلىسىم بولماسا، ەشقانداي رەفورما جانە ىلگەرىلەۋ بولمايتىنى ايدان انىق.
قازىر جاھاندىق سىن-قاتەرلەر الدەقايدا قاۋىپتى سيپات العان كەزدە قوعامىمىزدا تالاپ پەن تارتىپكە باسىمدىق بەرۋىمىز قاجەت»، – دەدى پرەزيدەنت.
ماجىلىستە قوعامدىق ءتارتىپتى، جول قاۋىپسىزدىگىن ساقتاۋ، بالالار قاۋىپسىزدىگى، جاستار اراسىنداعى قۇقىقبۇزۋشىلىقتىڭ جانە وتباسىلىق-تۇرمىستىق زورلىق-زومبىلىقتىڭ الدىن الۋ ماسەلەلەرى قارالدى.
ايماق باسشىسى وقيعا بولعان سوڭ ونىڭ سالدارىمەن كۇرەسپەي، الدىن الۋ تەتىكتەرىن كۇشەيتۋدىڭ ماڭىزىن اتاپ ءوتتى.
«بىزگە ەڭ ءبىرىنشى، ادام ءومىرى قىمبات، ونىڭ ىشىندە بالانىڭ ءومىرى مىڭ ەسە باعالى. ەڭ باستى ماقسات – تۇرعىنداردىڭ قاۋىپسىزدىگىن قامتاماسىز ەتۋ. قوعامدىق ءتارتىپتى ساقتاۋ، جاستار اراسىنداعى قۇقىقبۇزۋشىلىقتىڭ الدىن الۋ جانە تۇرعىنداردىڭ قاۋىپسىزدىگىن قامتاماسىز ەتۋ كۇندەلىكتى باقىلاۋدا بولۋى ءتيىس.
سوڭعى ءتورت جىلدا جەرگىلىكتى بيۋدجەتتەن پوليتسيا ورگاندارىنىڭ ماتەريالدىق-تەحنيكالىق بازاسىن جاڭعىرتۋعا 65 ملرد تەڭگەگە جۋىق قاراجات ءبولىندى. بۇل – ءوڭىر تۇرعىندارىنىڭ تىنىشتىعى مەن قاۋىپسىزدىگى ءۇشىن كورسەتىلىپ وتىرعان قولداۋ.
جىل باسىنان بەرى 1915 قىلمىستىق قۇقىقبۇزۋشىلىق تىركەلگەن. وتكەن جىلمەن سالىستىرعاندا 8,8 % تومەندەگەن. دەگەنمەن ستاتيستيكانىڭ جاقسارۋى جۇمىستى بوساڭسىتپاۋى ءتيىس. اسىرەسە بالالاردىڭ، جاسوسپىرىمدەردىڭ قاتىسۋىمەن بولاتىن وقيعالارعا مۇلدە بەيجاي قاراۋعا بولمايدى.سوڭعى اپتالارداعى وقيعالار وسى باعىتتاعى جۇمىسىمىزدى قايتا قاراۋدى تالاپ ەتەدى.
ارقايسىمىز جۇكتەلگەن مىندەتىمىزدى تولىق ورىنداپ، جاۋاپتى ورگاندار ءوز قۇزىرەتى شەگىندە ارەكەت ەتىپ، ورتاق ماقساتقا جۇمىلۋى ءتيىس. ول ءۇشىن كۇندەلىكتى ءتارتىپ، جاۋاپكەرشىلىك، ءوزارا ۇيلەسىم مەن ناقتى ناتيجە كەرەك.
تۇرعىندار ءوزىنىڭ قاۋىپسىزدىگىنە سەنىمدى بولىپ، بالالارىنىڭ اماندىعىنا الاڭداماۋى قاجەت. ءبىزدىڭ ماقساتىمىز – ەسەپ ءۇشىن جۇمىس ىستەۋ ەمەس، حالىقتىڭ تىنىشتىعىن قامتاماسىز ەتۋ. وسى مىندەتتى ءبارىمىز بىردەي ءتۇسىنىپ، جاۋاپكەرشىلىكپەن اتقارۋعا ءتيىسپىز»، – دەدى مۇرات نالقوجاۇلى.
ماجىلىستە قالاداعى جاستار كوپ جينالاتىن ورىنداردا، ويىن-ساۋىق نىساندارى مەن قۇقىقبۇزۋشىلىق قاۋپى جوعارى اۋماقتاردا پروفيلاكتيكالىق جۇمىستاردى جانداندىرۋ، رەيدتىك ءىس-شارالاردى جۇيەلى جۇرگىزۋ تاپسىرىلدى.
پروبلەمالىق اۋماقتاردا جاياۋ پاترۋلدەۋگە جانە ۋچاسكەلىك ينسپەكتورلاردىڭ تۇرعىندارمەن بايلانىسىناقاتىستى ناقتى شارالار قابىلداۋ كەرەك.
بالالار مەن جاسوسپىرىمدەردىڭ قاۋىپسىزدىگى ءۇشىن مەكتەپتەردە جانە مەكتەپتەن تىس ورتادا بۋللينگتىڭ، وزگە دە قۇقىقبۇزۋشىلىقتىڭ الدىن الۋدى جانداندىرۋ دا – جۇمىستىڭ ماڭىزدى تارماعى.
تاۋەكەل توبىنداعى بالالارمەن جانە ولاردىڭ اتا-انالارىمەن جۇمىستى كۇشەيتىپ، پوليتسيا، ءبىلىم بەرۋ ۇيىمدارى، پسيحولوگتار مەن الەۋمەتتىك قىزمەتتەردىڭ بىرلەسكەن ءىس-قيمىلىن ۇيلەستىرۋ قاجەت.
وتباسىلىق-تۇرمىستىق زورلىق-زومبىلىقتىڭ الدىن الۋ، الەۋمەتتىك قولداۋدى قاجەت ەتەتىن وتباسىلاردى انىقتاۋ جانە بالالاردىڭ قاۋىپسىزدىگىن قامتاماسىز ەتۋ بويىنشا جاۋاپتى ورگانداردىڭ جۇمىسىنا تالداۋ جۇرگىزىلەدى.
جيىن قورىتىندىسىندا قالا جانە اۋدان اكىمدەرىنە قۇقىق قورعاۋ ورگاندارىمەن بىرلەسكەن پروفيلاكتيكالىق جۇمىستاردى جانداندىرىپ، رەيدتىك ءىس-شارالاردى تۇراقتى جۇرگىزۋ مىندەتتەلدى.
