ابايدىڭ 180 جىلدىعىنا ارنالعان «سۇلۋ سىردان - ۇلى اباي ەلىنە» اتتى قىزىلوردا وبلىسىنىڭ ونەر كۇندەرى وسكەمەن قالاسىندا جالعاسىن تاپتى.
سىردىڭ بويىنان ەرتىس جاعاسىنا ساپار شەككەن دەلەگاتسيانى وبلىس اكىمى نۇرلىبەك نالىباەۆ باستاپ باردى. دەلەگاتسيا قۇرامىندا پارلامەنت سەناتى مەن ءماجىلىسىنىڭ دەپۋتاتتارى ن.بايقاداموۆ، ر.رۇستەموۆ، م.ەرگەشباەۆ، وبلىستىق ارداگەرلەر كەڭەسىنىڭ توراعاسى س.دۇيسەنباەۆ، ايماق ارداگەرلەرى، زيالى قاۋىم وكىلدەرى، تۇرماعامبەت اتىنداعى حالىق اسپاپتار، سيمفونيا وركەسترلەرى، «سىر سامالى» ۆوكالدى-اسپاپتى، «توميريس» بي انسامبلدەرى، حور ۇجىمى، باسقا دا ونەرپازدار بار.
شىعىس قازاقستان وبلىستىق فيلارمونياسىنا جينالعان كورەرمەنگە ونەرپازدار ءان-جىردان شاشۋ شاشتى.
ايماق باسشىسى ۇلت رۋحانياتى مەن مادەنيەتىنىڭ، ادەبيەتى مەن ونەرىنىڭ قاينار باستاۋىنداعى تۇلعالار تۇلەگەن شىعىس جۇرتشىلىعىنا ىزگى تىلەگىن ءبىلدىردى.
ء"وز زامانىنان كوش ىلگەرى ويلايتىن شاكارىم قۇدايبەردىۇلىنان «سىر – الاشتىڭ اناسى» دەگەن ناقىل قالعان. قيلى زاماندا، زۇلماتقا تولى كۇندەردە، اقتابان شۇبىرىندى كەزەڭىندە، ەل ءىشىن اشارشىلىق جايلاعاندا بۇكىل قازاق بالاسى كوش-كەرۋەنىنىڭ باسىن سىرعا بۇرىپ، سىردى اناسىنداي پانالاعان. سول سەبەپتى، الاشقا انا بولعان سىردىڭ قازاق ءۇشىن ورنى دا، ءجونى دە بولەك.
كۇللى تۇركى الەمىنىڭ التىن بەسىگى سانالاتىن التاي تورىندەگى شىرايلى شىعىس ولكەسى – تۇركىلەردىڭ سانا-سەزىمىن قالىپتاستىرعان، رۋحاني ۇياسىندا تالاي ۇلى تۇلعالار تاربيەلەنگەن قاسيەتتى مەكەن.
ىرىس اۋناپ، قۇت قونعان شىعىس قازاقستان – قازاق حالقىنىڭ جان-دۇنيەسىنىڭ تەرەڭدىگىن ايقىندايتىن كيەلى ولكە.
شىڭعىس تاۋىنىڭ بوكتەرىندە ۇلى ابايدىڭ 180 جىلدىعى پرەزيدەنتىمىزدىڭ قولداۋىمەن جوعارى دەڭگەيدە اتاپ ءوتىلۋى دە وسىنىڭ ايقىن دالەلى.
مەملەكەت باسشىمىز «ۇلى اباي – ءبىزدىڭ ەلىمىزدىڭ ماقتانىشى عانا ەمەس، الەمدىك دەڭگەيدەگى كەمەڭگەر. ونىڭ ولەڭدەرى مەن قارا سوزدەرى – ۇلتتىق بولمىسىمىزدىڭ ايناسى» دەگەن بولاتىن.
بارشاڭىزدى قازاقتىڭ ءبىرتۋار ۇلى اقىنى، «ادامزاتتىڭ ابايى» اتانعان اعارتۋشى، رۋحاني رەفورماتور اباي قۇنانبايۇلىنىڭ جالپىحالىقتىق تويىمەن سىر جۇرتشىلىعىنىڭ، ءوزىمنىڭ اتىمنان شىن جۇرەكتەن قۇتتىقتايمىن!!»، – دەدى ن.نالىباەۆ.
مەرەكەلىك باسقوسۋدا شىعىس قازاقستان وبلىسىنىڭ اكىمى نۇرىمبەت ساقتاعانوۆ ءسوز سويلەپ، ونەر كۇندەرىن وتكىزۋگە قولداۋ بىلدىرگەن وبلىس اكىمى نۇرلىبەك نالىباەۆقا، اتسالىسقان ونەرپازدارعا العىسىن جەتكىزدى.
كونتسەرتتە قورقىتتىڭ سارىنى قىلقوبىزدان توگىلىپ، «كۇلتەگىن» جىرىنىڭ ءۇزىندىسى ورىندالدى، كورەرمەن قوشەمەتىنە يە بولعان «قورقىت–قوبىز» ءانى شىرقالدى.
«ۇلى دالا پوەماسى» حورەوگرافيالىق قويىلىمىن قويعان «توميريس» بي انسامبلىنە ەرەكشە قۇرمەت كورسەتىلدى.
سىر سۇلەيلەرىنىڭ تولعاۋلارىنا سۋساعان كورەرمەنگە نۇرتۋعان جىراۋدىڭ «وسيەتى»، نارتاي اقىننىڭ
«وزدەرىڭ بىلەر نارتايمىن»، اق كەتە شەرنيازدىڭ ء«سوز سويلەيىن بولمەلەپ» تەرمەلەرى ۇسىنىلدى.
«بۇلدىرگەن»، «سۇرشا قىز»، «سىردىڭ قاراتورعايى»، «اۋىلىڭ سەنىڭ ىرگەلى» سياقتى حالىق اندەرى، الەمدىك كلاسسيكانىڭ جاۋھار تۋىندىلارى ورىندالدى.
ەسكە سالايىق، كەشە "سۇلۋ سىردان - ۇلى اباي ەلىنە" اتتى قىزىلوردا وبلىسىنىڭ ونەر كۇندەرى اباي وبلىسىندا ءوتتى.
