بۇگىن قىزىلوردا وبلىسىنىڭ جاڭاقورعان اۋدانى شالقيا كەنتىندە «Liaoning Hongda Group» كومپانياسى «بۋراباي-جالعىزاعاش» تاۋ-كەن بايىتۋ كومبيناتىنىڭ قۇرىلىسى رەسمي تۇردە باستالدى. وعان وبلىس اكىمى مۇرات ەرگەشباەۆ، «Liaoning Hongda Group» كومپانياسىنىڭ باس ديرەكتورى تان تسزيۋگان قاتىستى.
راسىمدە ايماق باسشىسى اۋدان تۇرعىندارىن قۇتتىقتاپ، جاڭا ءوندىرىس ورنى ءوڭىر ەكونوميكاسىنا تىڭ سەرپىن بەرەتىنىن اتاپ ءوتتى.
«كومبينات قۇرىلىسىنىڭ باستالۋى – سىر ءوڭىرى ءۇشىن تاريحي وقيعا. بۇل – وبلىسىمىزدىڭ يندۋستريالىق دامۋىنا جاڭا سەرپىن، ەكونوميكانى ارتاراپتاندىرۋعا جانە جاڭا جۇمىس ورىندارىن اشۋعا مول مۇمكىندىك بەرەتىن ءىرى ينۆەستيتسيالىق جوبا.
وسىنداي اۋقىمدى ءارى زاماناۋي جوبانى ايماعىمىزدا جۇزەگە اسىرعان «Liaoning Hongda Group» كومپانياسىنا زور ريزاشىلىعىمدى بىلدىرەمىن.
مەملەكەت باسشىسى قاسىم-جومارت كەمەلۇلى ەلىمىزدى جاڭا ينۆەستيتسيالىق تسيكلگە كوشىرۋ، زاماناۋي وندىرىستەردى ىسكە قوسۋ جانە وڭىرلەردىڭ ەكونوميكالىق الەۋەتىن ءتيىمدى پايدالانۋدى تاپسىرعان بولاتىن.
بۇگىنگى تاۋ-كەن بايىتۋ كومبيناتى – وسى اۋقىمدى جۇمىستاردىڭ اسا ماڭىزدى بولىگى. قۇرىلىسىنا 138 ملرد تەڭگە قارالعان جوبا تولىق ىسكە قوسىلعاندا جىلىنا 210 مىڭ توننا قورعاسىن-مىرىش شيكىزاتىن جانە 20 توننا كۇمىس ءوندىرۋ جوسپارلانۋدا. ەڭ باستىسى، 550-دەن استام جاڭا جۇمىس ورنى اشىلادى.
بۇگىن باستالىپ جاتقان قۇرىلىس ءساتتى اياقتالىپ، مەرزىمىندە ىسكە قوسىلىپ، ەل يگىلىگىنە قىزمەت ەتەتىنىنە سەنەمىن»، – دەدى مۇرات نالقوجاۇلى.
شارادا كومپانيا ديرەكتورى تان تسزيۋچان، ەل اعاسى يزاديللا نارزىلداەۆ ءسوز سويلەدى.
تاۋ-كەن بايىتۋ كومبيناتىن الداعى ەكى جىل ىشىندە سالىپ، 2028 جىلى تولىق اياقتاۋ جوسپارلانعان.
قازىرگى ۋاقىتتا كەن ورنىنىڭ مينەرالدىق-شيكىزات بازاسىن كەڭەيتۋ ماقساتىندا بۇرعىلاۋ جۇمىستارى جۇرگىزىلۋدە. سونداي-اق وندىرىستىك جولدار سالۋ دا قولعا الىنىپ، قۇرىلىس الاڭدارى انىقتالدى. بۇدان بولەك، ەلەكتر جەلىلەرىنە قوسىلۋعا جوبا-سمەتالىق قۇجاتتاما ازىرلەندى. قازىرگى ۋاقىتتا نىساندى ەلەكتر قۋاتىمەن قامتاماسىز ەتۋ جانە ەلەكتر جەلىلەرىنە قوسۋ مەجەلەنگەن.
ايتا كەتەيىك، كەيىنگى جىلدارى سىر وڭىرىندە جاڭا ءوندىرىس ورىندارىنىڭ نەگىزى قالانىپ، ءىرى جوبالار جۇزەگە اسۋدا. جاڭاقورعان اۋدانىندا ءۇش جىلدا 6,7 ملرد تەڭگەدەن استام قارجىعا 9 ينۆەستيتسيالىق جوبا ىسكە قوسىلدى. بيىل 3 جوبا كوزدەلسە، ونىڭ ەكەۋى ەل يگىلىگىنە اينالدى. الداعى ءۇش جىلدا وبلىستىڭ ونەركاسىپ سالاسىندا 1,9 تريلليون تەڭگەگە 48 ينۆەستيتسيالىق جوبانى جۇزەگە اسىرۋ جوسپارلانعان. ناتيجەسىندە 10 مىڭنان استام جاڭا جۇمىس ورنى قۇرىلادى.
