بۇگىن قورقىت اتا اتىنداعى قىزىلوردا ۋنيۆەرسيتەتىندە سىر ءوڭىرىنىڭ بەلگىلى پەداگوگى، جۋرناليست، قوعام قايراتكەرى قالقاباي ابەنوۆ اتىنداعى جۋرناليستىك شەبەرلىك زەرتحاناسى اشىلدى.
زەرتحانا ءبىلىم الۋشىلاردىڭ جۋرناليستيكا سالاسىنداعى تەوريالىق ءبىلىمىن تاجىريبەمەن ۇشتاستىرۋعا، زاماناۋي مەديا قۇرالدارىمەن جۇمىس ىستەۋ داعدىلارىن جەتىلدىرۋگە جانە شىعارماشىلىق قابىلەتتەرىن دامىتۋعا مۇمكىندىك بەرەدى.
ءىس-شارانىڭ اشىلۋ سالتاناتىندا قورقىت اتا اتىنداعى قىزىلوردا ۋنيۆەرسيتەتىنىڭ باسقارما توراعاسى – رەكتور ناۋرىزباي بايقاداموۆ ءسوز سويلەپ، جاڭا زەرتحانانىڭ جاس جۋرناليستەردىڭ كاسىبي بىلىكتىلىگىن ارتتىرۋداعى ماڭىزىن اتاپ ءوتتى.
ءىس-شارا بارىسىندا ۋنيۆەرسيتەتتىڭ ستراتەگيالىق دامۋىنا قوسقان ۇلەسى ءۇشىن قالقاباي ابەنوۆتىڭ ۇلى قانات قالقابايۇلى قورقىت اتا اتىنداعى «التىن مەدالمەن» ماراپاتتالدى.
سالتاناتتى شارادا قىزىلوردا وبلىسىنىڭ قوعامدىق دامۋ باسقارماسىنىڭ باسشىسى رۋسلان كايۋپوۆ، فيلولوگيا عىلىمدارىنىڭ دوكتورى، پروفەسسور جەڭىس سادۋاقاسۇلى، وبلىستىق «سىر بويى» گازەتىنىڭ باس رەداكتورى قۋات شارابيدينوۆ، سىر ءوڭىرىنىڭ كورنەكتى ءجۋرناليسى، قوعام قايراتكەرى، «سىر جۋرناليستيكاسى» قورىنىڭ قۇرىلتايشىسى قوجاحمەت مىرزاەۆ ءسوز سويلەپ، قالقاباي ابەنوۆتىڭ جۋرناليستيكاداعى ونەگەلى جولى مەن ءوڭىر ءباسپاسوزىنىڭ دامۋىنا قوسقان ۇلەسى تۋرالى ەستەلىكتەرىمەن ءبولىستى.
جۋرناليستىك شەبەرلىك زەرتحاناسىنىڭ اشىلۋ سالتاناتىندا لەنتا قيۋ ءراسىمى فيلولوگيا عىلىمدارىنىڭ دوكتورى، پروفەسسور جەڭىس سادۋاقاسۇلى مەن قازاقستان جازۋشىلار وداعىنىڭ مۇشەسى، قازاقستاننىڭ قۇرمەتتى ءجۋرناليستى كەنجالى رايىمبەكۇلىنا بەرىلدى.
جاڭادان اشىلعان زەرتحانانى ۋنيۆەرسيتەتتىڭ «قازاق ءتىلى مەن ادەبيەتى جانە جۋرناليستيكا» اعا وقىتۋشىسى اسىل قوجابايقىزى تانىستىردى.
سالتاناتتى شاراعا وبلىستاعى زيالى قاۋىم وكىلدەرى، ارداگەر ۇستازدار، ۋنيۆەرسيتەتتىڭ پروفەسسور-وقىتۋشىلار قۇرامى، قالقاباي ابەنوۆتىڭ وتباسى مەن تۋعان-تۋىستارى، جۋرناليستەر جانە ءبىلىم الۋشىلار قاتىستى.
قالقاباي ابەنوۆ - حح عاسىردىڭ ەكىنشى جارتىسىنداعى سىر ءوڭىرىنىڭ قوعامدىق-ساياسي، رۋحاني جانە مادەني ومىرىندە وزىندىك ورنى بار كورنەكتى جۋرناليست، سوعىس ارداگەرى، قازاقستان رەسپۋبليكاسى جۋرناليستەر وداعىنىڭ مۇشەسى، قوعام قايراتكەرى، ۇزاق جىلدار بويى قىزىلوردا وبلىستىق «لەنين جولى»، قازىرگى «سىر بويى» گازەتىنىڭ رەداكتورى قىزمەتىن اتقارعان.
