ەلىمىزدە «كىتاپ وقيتىن ۇلت – چيتايۋششايا ناتسيا» رەسپۋبليكالىق مارافونى باستالدى.
مەملەكەت باسشىسى قاسىم-جومارت توقاەۆتىڭ جارلىعىن ىسكە اسىرۋعا باعىتتالعان جوبا قوعامدا تۇراقتى كىتاپ وقۋ مادەنيەتىن قالىپتاستىرۋدى، سىني ويلاۋدى دامىتۋدى جانە قازاقستاندى الەمدەگى كىتاپ وقيتىن وزىق ون ەلدىڭ قاتارىنا قوسۋدى كوزدەيدى. اۋقىمدى زياتكەرلىك-اعارتۋشىلىق جوباعا مەكتەپ وقۋشىلارى، كوللەدج جانە جوعارى وقۋ ورىندارىنىڭ ستۋدەنتتەرى، پەداگوگتەر، مەملەكەتتىك قىزمەتشىلەر، كىتاپسۇيەر اۋلەتتەر مەن مادەنيەت جانە عىلىم سالاسىنىڭ وكىلدەرى قاتىسا الادى. بۇل تۋرالى وڭىرلىك كوممۋنيكاتسيالار قىزمەتىنىڭ اقپارات الاڭىندا وبلىستىق مادەنيەت، ارحيۆتەر جانە قۇجاتتاما باسقارماسى باسشىسىنىڭ ورىنباسارى عالىمجان كۇلباەۆ، وڭىرلىك جوبالىق كەڭسەسىنىڭ باسشىسى، قازاقستان جازۋشىلار جانە جۋرناليستەر وداعىنىڭ مۇشەسى، «ادىلەت» پارتياسىنىڭ سىرداريا اۋداندىق فيليالىنىڭ توراعاسى اقتورە يبراگيمۇلى جانە ءا.تاجىباەۆ اتىنداعى وبلىستىق امبەباپ عىلىمي كىتاپحاناسىنىڭ باسشىسى ساپار كوزەيباەۆ مالىمدەدى.
– «كىتاپ وقيتىن ۇلت» رەسپۋبليكالىق مارافونى مەملەكەت باسشىسىنىڭ كىتاپ وقۋ مادەنيەتىن دامىتۋ جانە زەردەلى ۇلت قالىپتاستىرۋ جونىندەگى باستاماسىن جۇزەگە اسىرۋعا باعىتتالعان. جوبا قازاقستان رەسپۋبليكاسى مادەنيەت جانە اقپارات مينيسترلىگىنىڭ قولداۋىمەن 2 قىركۇيەكتەن باستاپ رەسمي تۇردە باستاۋ الدى.
مارافوننىڭ نەگىزگى ماقساتى - كىتاپ وقۋدى كەڭىنەن ناسيحاتتاۋ ارقىلى ۇلتتىق بىرەگەيلىك پەن ءتىلدىڭ دامۋىنا ىقپال ەتۋ، ويلاۋ قابىلەتى مەن زياتكەرلىك الەۋەتتى ارتتىرۋ. جوبا مەكتەپ، كوللەدج، ۋنيۆەرسيتەت، پەداگوگ، اۋلەت، مەملەكەتتىك قىزمەتشى جانە «زياتكەر» باعىتتارى بويىنشا ۇيىمداستىرىلادى. قاتىسۋشىلار 330 كىتاپتان تۇراتىن ارنايى تىزىمنەن ءوز تاڭداۋى بويىنشا 15 كىتاپ وقىپ، كەيىن ارنايى تەستتەر مەن كۆەستتەرگە قاتىسادى. مارافونعا التىنشى سىنىپ وقۋشىسىنان باستاپ، اتا-انا مەن زيالى قاۋىم وكىلدەرىنە دەيىن كەز كەلگەن ازامات قاتىسا الادى. مۇندا جاس شەكتەۋى جوق. باستى تالاپ – كىتاپ وقۋ. وڭىرلىك كەزەڭدەردىڭ جەڭىمپازدارى مەن جۇلدەگەرلەرىنە اقشالاي سىيلىقتار قاراستىرىلعان. ۇزدىكتەر ارنايى تەستتەر مەن كۆەستتەردىڭ قورىتىندىسى بويىنشا انىقتالادى ،- دەدى عالىمجان قىدىرياۇلى.
– جوبانىڭ الداعى بەس جىلعا ارنالعان ءورشىل ماقساتى – قازاقستان حالقىنىڭ 50 پايىزىن كىتاپ وقۋ مادەنيەتىنە تارتۋ. بۇل - وتباسى، بالالار مەن جاستاردى، كىتاپحانالاردى، ءبىلىم بەرۋ جانە مادەنيەت ۇيىمدارىن، سونداي-اق بۇكىل قوعامدى كىتاپ وقۋ ارقىلى دامۋ يدەياسىنىڭ توڭىرەگىنە بىرىكتىرەتىن قوزعالىس. بىرەگەي جوبا وقۋ مادەنيەتىن ىلگەرىلەتۋدىڭ ءتۇرلى فورماتتارىن سىناقتان وتكىزۋگە، بالالار مەن ەرەسەكتەردى تارتۋعا جانە باستاما اۋقىمىن بۇكىل ەل كولەمىندە جۇزەگە اسىرۋعا مۇمكىندىك بەردى.
كىتاپ وقۋ مارافونى 2026 جىلعى قىركۇيەك پەن 2027 جىلعى ناۋرىز ارالىعىندا التى اي بويى وتەدى. ناتيجەسىندە ۇزدىك وقىرماندار فينالعا جولداما الىپ، رەسپۋبليكالىق دەڭگەيدە باعالى سىيلىقتارمەن جانە ديپلومدارمەن ماراپاتتالادى. مارافونعا قاتىسۋ ءۇشىن reading-nation.kz سايتىنا كىرىپ، تىركەلۋ قاجەت. پلاتفورمادا «قالاي جەڭىمپاز اتانۋعا بولادى؟» ءبولىمى ارقىلى جوبا شارتتارىمەن جانە ءار باعىت بويىنشا ۇسىنىلعان كىتاپتار تىزىمىمەن تولىق تانىسۋعا بولادى ،- دەدى اقتورە يبراگيمۇلى.
ءوز كەزەگىندە ساپار الياسقارۇلى ءوڭىر كىتاپحانالارىندا وقىرمانداردىڭ كىتاپقا قىزىعۋشىلىعىن ارتتىرۋعا باعىتتالعان بىرقاتار جوبا جۇزەگە اسىرىلىپ جاتقانىن اتاپ ءوتتى. بيىل «كىتاپ كەرۋەنى» جوباسى وبلىستىڭ بىرقاتار اۋىلدارىندا ۇيىمداستىرىلىپ، مەكتەپ وقۋشىلارى اراسىندا «جازعى وقۋ سايىسى» وتكىزىلدى.
سونىمەن قاتار، قىزىلوردا وبلىسى اكىمدىگى مەن «كىتاپ وقيتىن ۇلت – چيتايۋششايا ناتسيا» قوعامدىق قورى اراسىندا ىنتىماقتاستىق مەموراندۋمى جاسالىپ، وڭىردە وقۋ مارافونى باستاۋ الدى.
– الداعى ۋاقىتتا كىتاپحانالاردى جاستاردىڭ تۇراقتى باس قوساتىن ورتالىعىنا اينالدىرۋعا باسىمدىق بەرەمىز. وسى ماقساتتا اباي وقۋلارى، اشىق ەسىك كۇندەرى، «كىتاپ-تايم» فەستيۆالى جانە «ۇزدىك وقىرمان - 2026» وبلىستىق بايقاۋى سياقتى جوبالار جۇزەگە اسىرىلادى. بۇل باستامالار وقىرمانداردىڭ كىتاپقا قىزىعۋشىلىعىن ارتتىرىپ، وقۋ مادەنيەتىن قالىپتاستىرۋعا باعىتتالعان. ودان بولەك، كىتاپحانالاردى جاڭعىرتۋ، تسيفرلىق مۇمكىندىكتەردى كەڭەيتۋ، جاستارعا ارنالعان كرەاتيۆتى جوبالاردى كوبەيتۋ، ۇلتتىق ادەبيەتتى حالىقارالىق دەڭگەيدە ناسيحاتتاۋ باعىتىنداعى جۇمىستار الداعى ۋاقىتتا دا قارقىندى داميتىن بولادى ، - دەدى ساپار الياسقارۇلى.
بريفينگتە سپيكەرلەر باق وكىلدەرىنىڭ سۇراعىنا جاۋاپ بەرىپ، جوباعا اقپاراتتىق قولداۋ كورسەتۋگە، بىرلەسە جۇمىس ىستەۋگە شاقىردى.
