پرەمەر-ءمينيستردىڭ ورىنباسارى الماتىعا جۇمىس ساپارىمەن بارىپ، مەگاپوليستەگى كولىك-لوگيستيكالىق، ەنەرگەتيكالىق، يندۋستريالىق جانە تۋريستىك جوبالاردىڭ جۇزەگە اسۋ بارىسىمەن تانىستى، دەپ حابارلايدى "ادىرنا" ۇلتتىق پورتالى.
ۆيتسە-پرەمەر نۇرلىبەك نالىباەۆتىڭ ايتۋىنشا، الماتىنىڭ دامۋى مەن تۇرعىنداردىڭ ءومىر ساپاسىن ارتتىرۋ ماسەلەسى قاسىم-جومارت توقاەۆتىڭ ەرەكشە باقىلاۋىندا. ۇكىمەت ينفراقۇرىلىمدىق جوبالاردى ۋاقىتىلى اياقتاۋ جانە ەنەرگەتيكالىق نىسانداردىڭ تۇراقتى جۇمىسىن قامتاماسىز ەتۋ باعىتىندا قاجەتتى شارالاردى قابىلداپ جاتىر.
جۇمىس ساپارى بارىسىندا ۆيتسە-پرەمەر الدىمەن الماتى حالىقارالىق اۋەجايى اۋماعىنداعى ينفراقۇرىلىمدىق جوبالاردى تەكسەردى. قازىرگى تاڭدا مۇندا VIP-پەررون، ۇشاقتاردى مۇزدان تازارتۋ الاڭى جانە جاڭا جۇك تۇراقتارى سالىنىپ جاتىر. اۋەجايدى باسقاراتىن كومپانياسىنا جاڭعىرتۋ جۇمىستارىن 1 شىلدەگە دەيىن اياقتاۋ تاپسىرىلدى.
سونىمەن قاتار، الماتى-1 تەمىرجول ۆوكزالىنداعى جاڭعىرتۋ جۇمىستارىنىڭ باياۋ ءجۇرىپ جاتقانى سىنعا الىندى. ۆيتسە-پرەمەر جولاۋشىلارعا قولايسىزدىق تۋعىزباۋ ءۇشىن قۇرىلىس قارقىنىن كۇشەيتىپ، قاجەت بولعان جاعدايدا تاۋلىك بويى جۇمىس ىستەۋدى تاپسىردى. ساپار اياسىندا ۇلكەن الماتى اينالما اۆتوجولى قۇرىلىسىنىڭ بارىسى دا قارالدى. جوبانى جۇزەگە اسىرۋ بارىسىندا جەر تەلىمدەرىن ساتىپ الۋ مەن بوساتۋعا قاتىستى ماسەلەلەر بار ەكەنى ايتىلدى. ۇكىمەت قۇرىلىس جۇمىستارىن جەدەلدەتۋ قاجەتتىگىن اتاپ ءوتتى.
سونداي-اق ۆيتسە-پرەمەر Astana Motors Manufacturing Kazakhstan بازاسىندا قۇرىلعان اۆتوموبيل كلاستەرىنىڭ جۇمىسىمەن تانىستى. جوبا جاڭا جۇمىس ورىندارىن اشىپ، ونەركاسىپتىك الەۋەتتى ارتتىرۋعا باعىتتالعان.
