پرەزيدەنت قاسىم-جومارت توقاەۆ ەلوردا تورىندە وتكەن سىبايلاس جەمقورلىقپەن كۇرەس ماسەلەلەرىنە ارنالعان كەڭەستە الماتىدا "سەرگەك" كامەرالارىنىڭ سانى ۇلعايتىلاتىنىن ايتقان ەدى، دەپ حابارلايدى «ادىرنا» ءتىلشىسى.
مەملەكەت باسشىسى ءىرى قالالاردا ورناتىلعان بەينەباقىلاۋ كامەرالاراىنىڭ وڭ اسەرىن تيگىزىپ تۇرعانىنا توقتالىپ، الىپ قالاداعى كامەرا سانىن ارتتىرۋعا تاپسىرما بەرگەن ەدى.
"قاڭتار وقيعالارى كەزىندە باسبۇزارلار قولىمەن 500 كامەرانى سىندىرعان الماتى قالاسى بويىنشا تاپسىرما بەردىم. ولاردى قالپىنا كەلتىرىپ عانا قويماي، كامەرالاردىڭ سانىن ۇلعايتۋ كەرەك. اڭگىمە ءبىزدىڭ ازاماتتاردىڭ ءىس-ارەكەتىنە قانداي دا ءبىر جالپى مونيتورينگ نەمەسە باقىلاۋ ورناتۋ جايىندا ەمەس. بۇل تۇرعىنداردىڭ تىكەلەي قاۋىپسىزدىك ماسەلەسى", - دەدى توقاەۆ.
پرەزيدەنتتىڭ بۇل پارمەنى شاھاردا قالتقىسىز ورىندالىپ جاتىر. بۇل تۋرالى قالا اكىمى ەربولات دوساەۆ مالىمدەدى.
"حالىقتىڭ قاۋىپسىزدىگىن قامتاماسىز ەتۋ جانە ناۋرىزباي اۋدانىنىڭ اۋماعىن بەينەباقىلاۋ كامەرالارىمەن قامتۋ ماقساتىندا 300 كامەرانى ورناتۋ جۇمىستارى باستالدى (148– اۋلادا، 100– كوشەدە، 52– الەۋمەتتىك وبەكتىدە). بۇل جۇمىستار وسى جىلدىڭ سوڭىنا دەيىن اياقتالادى", - دەپ حابارلادى قالا اكىمى.
2023 جىلدىڭ I-توقسانىندا 369 كامەراعا ەسەپتەلگەن قازىرگى 36«سەرگەك» اپپاراتتىق-باعدارلامالىق كەشەنىنە (21-جەلىلىك ۋچاسكەلەردە، 15 - كوشە قيىلىستارىندا) قوسىمشا 205 كامەراعا ەسەپتەلگەن 20 «سەرگەك» اپپاراتتىق-باعدارلامالىق كەشەنى (19 – جەلىلىك ۋچاسكەلەردە، 1 – جول قيىلىسىندا) ورناتىلادى.
