الماتى تاۋ كلاستەرىن دامىتۋ جوباسى اياسىندا كىماسار شاتقالىندا 1 500 جاتاعان شىرشاسىن وتىرعىزۋ جونىندەگى ەكولوگيالىق اكتسيا ءوتتى.
بۇل ءىس-شاراعا الماتى قالاسى اكىمىنىڭ ورىنباسارى ولجاس سماعۇلوۆ، ەكولوگيالىق ۇيىمدار، بيزنەس، سپورت جانە مادەنيەت قاۋىمداستىعىنىڭ وكىلدەرى، سونداي-اق بەلسەندى جاستار مەن تۇرعىندار قاتىستى. ولار الماتىنىڭ تابيعي مۇراسىن ساقتاۋ دەگەن ورتاق ماقسات توڭىرەگىندە بىرىكتى.
ولجاس سماعۇلوۆ اتالعان اكتسيا الماتى تاۋ كلاستەرىنىڭ زاماناۋي تۋريستىك ينفراقۇرىلىمىن دامىتۋمەن قاتار جۇرگىزىلىپ جاتقان تاۋلى اۋماقتاردى كوگالداندىرۋ بويىنشا جۇيەلى جۇمىستىڭ جالعاسى ەكەنىن اتاپ ءوتتى.
- بۇگىن الماتى تاۋ كلاستەرىن دامىتۋ جوباسى اياسىندا ۇلكەن اكتسيا ءوتىپ جاتىر. بەيجاي قالماي كەلگەن بارلىق ازاماتتارعا العىسىمدى بىلدىرەمىن. مۇندا 500-گە جۋىق ادام جينالدى جانە 1,5 مىڭ شىرشا وتىرعىزىلدى. بۇل وسىنداي ءۇشىنشى جوبا. الداعى ۋاقىتتا دا وسىنداي اكتسيالاردى وتكىزىپ وتىرامىز، - دەدى الماتى اكىمىنىڭ ورىنباسارى.
بيىل قازان ايىنىڭ وزىندە الماتىنىڭ تاۋلى اۋماعىندا شامامەن 4 مىڭ قىلقان جاپىراقتى اعاش وتىرعىزىلدى. ماسەلەن، 3 قازاندا كوكجايلاۋدا 2 مىڭعا جۋىق جاتاعان (شرەنك) شىرشاسى وتىرعىزىلسا، 17 قازاندا «شىمبۇلاق» تاۋ كۋرورتىنىڭ اۋماعىندا 500-دەن استام تيان-شان شىرشاسى ەگىلدى. كىماسار شاتقالىندا تاعى 1,5 مىڭ اعاش وتىرعىزۋ - وسى باستامانىڭ جالعاسى.
ەكولوگيالىق جاۋاپكەرشىلىك — الماتى تاۋ كلاستەرىن دامىتۋدىڭ نەگىزگى قاعيداتتارىنىڭ ءبىرى. جوبا حالىقارالىق دەڭگەيدەگى تۋريستىك ينفراقۇرىلىمدى قۇرۋمەن قاتار، اۋماقتاردى كوگالداندىرۋعا، بيولوگيالىق ارالۋاندىقتى ساقتاۋعا جانە تاۋ ەكوجۇيەلەرىنىڭ تۇراقتىلىعىن قامتاماسىز ەتەتىن تابيعاتتى قورعاۋ شارالارىن قاراستىرادى.
بوستاندىق اۋدانى كوميۋنيتي-ورتالىعىنىڭ جەتەكشىسى اقارىس تورەبەكوۆ قالا جاستارى مۇنداي اكتسيالارعا ءاردايىم بەلسەندى قاتىساتىنىن اتاپ ءوتتى. ونىڭ ايتۋىنشا، مۇنداي ءىس-شارالار جاستاردىڭ ءوز قولىمەن اعاش وتىرعىزىپ، ەكولوگيالىق مادەنيەتىن كوتەرۋگە مۇمكىندىك بەرەدى.
- ءبىز، الماتى جاستارى، اعاش وتىرعىزۋعا باعىتتالعان اكتسيادان سىرت قالماي، بەلسەندى قاتىسۋعا كەلدىك. بۇل ۋاقىتىمىزدى كوڭىلدى ءارى پايدالۋ وتكىزۋدىڭ كەرەمەت مۇمكىندىگى. ءاردايىم قالانى كوركەيتۋگە، قورشاعان ورتانى قورعاۋعا ارنالعان جۇمىستارعا قۋانا قاتىسامىز، - دەدى ول.
ءىس-شاراعا ازيا ويىندارىنىڭ تاەكۆوندودان ەل تاريحىنداعى تۇڭعىش چەمپيونى تەمىرلان تىلەۋلەس تە قاتىستى. ول تاۋلى ايماقتى كوگالداندىرۋعا ارنالعان اكتسيانىڭ ءبىر بولىگىنە بولعانىنا قۋانىشتى ەكەنىن ايتتى.
- بۇكىل الماتى ءۇشىن بۇل يگى باستاما. اعاش وتىرعىزۋ ارقىلى ءبىز تابيعاتتى كوركەيتىپ، اۋانىڭ تازارۋىنا كىشكەنە دە بولسا، ۇلەس قوسىپ جاتىرمىز. ادامداردىڭ وسىلاي جينالىپ، ءبىر-بىرىنە كومەك بەرىپ ءجۇرۋ دە كەرەمەت كورىنىس، - دەدى ازيادا چەمپيونى.
سونىمەن قاتار اكتسياعا جاپونيادا وتكەن ازيا ويىندارىندا حالىق ىقىلاسىنا بولەنگەن سپورتشى ياسمينا توقسانباەۆا دا ءوز ۇلەسىن قوستى.
- ءبىزدىڭ جاتتىعۋىمىزدىڭ ءبىر بولىگى ءاردايىم تاۋدا وتەدى. جىلىنا ەكى اي ءبىز تاۋدا جۇگىرەمىز، جاتتىعامىز. سوندىقتان ونىڭ كوركەيىپ جاتقانىنا قۋانىشتىمىز. الماتى تاۋلارىنىڭ مەنىڭ ءۇيىم دەۋگە بولادى، - دەدى ول.
ايتا كەتكەن ءجون، كوگالداندىرۋ ءۇشىن الماتىنىڭ تابيعي سيمۆولدارىنىڭ ءبىرى جانە سولتۇستىك تيان-شان ەكوجۇيەلەرىن ساقتاۋدا ماڭىزدى ءرول اتقاراتىن جاتاعان شىرشاسى تاڭدالدى. وڭىرگە ءتان اعاش تۇرلەرىن وتىرعىزۋ تابيعي ارالۋاندىقتى قولداۋعا ىقپال ەتۋدە.
