پرەزيدەنت قاسىم-جومارت توقاەۆ 2026 جىلعى 17 شىلدەدە بولات اقشولاقوۆتى اتىراۋ وبلىسىنىڭ اكىمى ەتىپ تاعايىندادى. رەسمي اقپارات اقوردانىڭ Telegram-ارناسىندا جاريالاندى، دەپ حابارلايدى "ادىرنا".
"مەملەكەت باسشىسىنىڭ جارلىعىمەن بولات ورالۇلى اقشولاقوۆ اتىراۋ وبلىسىنىڭ اكىمى لاۋازىمىنا تاعايىندالدى", – دەپ جازىلعان رەسمي اقپاراتتا.
ەستەرىڭىزگە سالا كەتسەك، بۇعان دەيىن بۇل مىندەتتى سەرىك شاپكەنوۆ اتقارعان بولاتىن. ول بۇگىن پرەزيدەنتتىڭ جارلىعىمەن اتالعان قىزمەتتەن بوساتىلدى.
بولات ورالۇلى اقشولاقوۆ 1971 جىلدىڭ 9 ساۋىرىندە گۋرەۆ قالاسىندا (قازىرگى اتىراۋ) دۇنيەگە كەلگەن. ول - قازاقستاندىق مەملەكەت قايراتكەرى، مۇناي-گاز سالاسىنىڭ مامانى جانە 2025 جىلعى اقپاننان بەرى KAZENERGY قاۋىمداستىعىنىڭ توراعاسى.
1993 جىلى قازاق مەملەكەتتىك باسقارۋ اكادەمياسىن "ەكونوميست" ماماندىعى بويىنشا تامامداعان. سونىمەن قاتار "جەر قويناۋىن پايدالانۋ كەلىسىمشارتتارىن باعالاۋ" جانە "مۇناي ءوندىرۋ ەكونوميكاسى" باعدارلامالارى بويىنشا ءبىلىم العان.
ەڭبەك جولىن بانك سالاسىندا باستاپ، كەيىن "قازاقويل", "قازمۇنايگاز", "سامۇرىق-قازىنا" جانە PSA كومپانيالارىندا قىزمەت اتقارعان.
ءار جىلدارى ەنەرگەتيكا جانە مينەرالدىق رەسۋرستار ۆيتسە-ءمينيسترى، مۇناي جانە گاز ۆيتسە-ءمينيسترى، سونداي-اق قازاقستاننىڭ ەنەرگەتيكا ۆيتسە-ءمينيسترى بولىپ قىزمەت اتقارعان.
2022 جىلدىڭ قاڭتاردا قازاقستان رەسپۋبليكاسىنىڭ ەنەرگەتيكا ءمينيسترى بولىپ تاعايىندالىپ، بۇل قىزمەتتى 2023 جىلعى ساۋىرگە دەيىن اتقاردى. كەيىن قازاقستان پرەزيدەنتىنىڭ كەڭەسشىسى بولىپ، 2025 جىلدىڭ اقپانىنان باستاپ قازاقستاننىڭ مۇناي-گاز جانە ەنەرگەتيكا كەشەنى ۇيىمدارىنىڭ KAZENERGY قاۋىمداستىعىن باسقاردى.
