اتىراۋدا قوعامدىق قاۋىپسىزدىكتى قامتاماسىز ەتۋ ءۇشىن جاساندى ينتەللەكت نەگىزىندەگى بەينەاناليتيكا جۇيەسى ەنگىزىلىپ، 400 كامەرا جي ارقىلى قىزمەت ەتۋدە. ىشكى ىستەر ءمينيسترى جاريالاعان پروفيلاكتيكا جىلى اياسىندا اتىراۋ وبلىسىندا “زاڭ مەن ءتارتىپ” قاعيداتىن جۇزەگە اسىرۋ ماقساتىندا ىسكە قوسىلعان ينتەللەكتۋالدى بەينەاناليتيكا جۇيەسى پوليتسيانىڭ قوعامدىق قاۋىپسىزدىكتى قامتاماسىز ەتۋ جانە قۇقىق بۇزۋشىلىقتاردىڭ الدىن الۋ جۇمىستارىن ءتيىمدى اتقارۋىنا مۇمكىندىك بەرۋدە.
بۇگىندە اتىراۋ قالاسىندا جاساندى ينتەللەكت ەلەمەنتتەرى بار 400 بەينەباقىلاۋ كامەراسى جۇمىس ىستەيدى. ولار ادامدار كوپ جينالاتىن نىساندارعا – ايالدامالارعا، اۋەجاي مەن تەمىرجول ۆوكزالىنا، سونداي-اق اۆتوۆوكزال اۋماعىنا ورناتىلعان.
جۇيە ازاماتتاردىڭ ءجۇزىن تانىپ، اگرەسسيۆتى مىنەز-قۇلىقتى، ادامداردىڭ شامادان تىس جينالۋىن، جانە وزگە دە كۇماندى جاعدايلاردى اۆتوماتتى تۇردە تىركەيدى. مۇنداي جايت انىقتالعان ساتتە جۇيە جەدەل قىزمەتتەرگە بىردەن دابىل سيگنالى جىبەرەدى. سونداي-اق، جۇيەگە ىزدەۋدەگى، ەسەپتەگى تۇلعالاردىڭ فوتوسۋرەتتەرى ەنگىزىلگەن، كامەرا وبەكتيۆىنە ىلىنگەن بويدا بەت پىشىندەرى ارقىلى سايكەستەندىرىلىپ، لەزدە جەدەل باسقارۋ ورتالىعىنا حابارلاما تۇسەدى.
اتىراۋ وبلىسى پد جەدەل باسقارۋ ورتالىعى باستىعىنىڭ ورىنباسارى ءارى جەدەل دەن قويۋ ءبولىمىنىڭ باستىعى پوليتسيا پولكوۆنيگى جانات راحمەتوۆانىڭ ايتۋىنشا، بەينەاناليتيكا جۇيەسى ءوز تيىمدىلىگىن دالەلدەپ ۇلگەرگەن.
– جىل باسىنان بەرى بەينەاناليتيكا جۇيەسىنىڭ كومەگىمەن 72 ادام انىقتالىپ، ونىڭ ىشىندە 28 قۇقىق بۇزۋشى پوليتسياعا جەتكىزىلدى. انىقتالعانداردىڭ باسىم بولىگى – اۋەجاي، تەمىرجول جانە اۆتوۆوكزال اۋماقتارىندا جاساندى ينتەللەكت ارقىلى بەت بەينەسى سايكەستەندىرىلىپ تانىلعان ازاماتتار، – دەدى ول.
ايتا كەتۋ كەرەك، “TargetEye” باعدارلاماسىمەن جىل باسىنان- 4516 اكىمشىلىك قۇقىقبۇزۋشىلىق انىقتالىپ، 125 قىلمىس اشىلعان.
جاڭا تسيفرلىق تەحنولوگيالار پوليتسيا جۇمىسىنىڭ تيىمدىلىگىن ارتتىرىپ، قوعامدىق قاۋىپسىزدىك دەڭگەيىن كوتەرۋگە باعىتتالعان. بولاشاقتا مۇنداي ينتەللەكتۋالدى جۇيەلەردى وبلىستىڭ وزگە اۋداندارىنا ورناتۋ جوسپارلانىپ وتىر.
