اۋىل تۇرعىندارى قايتىس بولعان ءۇش بالانىڭ ءمايىتىن وزدەرى ىزدەمەك بولدى. تىرىدەي تابىلىپ قالار دەگەن ۇمىتتەرىن دە جاسىرمادى، دەپ حابارلايدى “ادىرنا” ۇلتتىق پورتالى.
تۋىستارى پوليتسەيلەرگە نارازى ەكەنىن جەتكىزدى. بالالارىنىڭ ءمايىتىن تاپقانىن بىردەن حابارلاماعانىنا اشۋلى.
اۋىل بوپ ءۇش بالانى ىزدەۋگە شىققانىندا، ولاردىڭ ادام اجىراتا المايتىنداي ءمايىتىن تاپقان.
“ولار كۇشىكپەن ويناپ جۇرگەن، كۇشىك ءشوپتىڭ اراسىنا كىرىپ كەتكەن. ەكىنشى، ءۇشىنشى سىنىپ وقيتىن ءۇش بالا كۇشىكتىڭ ارتىنان شوپكە كىرگەن. ولار نە ىستەپ جاتقانىن بىلمەگەن. قاراڭعى بولعاننان كەيىن سىرىڭكە جاعىپ، جارىق جاسايىن دەگەن. وسىلايشا ءشوپ تۇتانىپ كەتكەن. بالالاردىڭ دەنەلەرى تابىلدى. بىراقتا ولاردى تانۋ مۇمكىن ەمەس”، – دەيدى اۋىل تۇرعىنى ادىلبەك ىزعاليەۆ.
مارقۇم بولعان بالالاردىڭ ءبىرىنىڭ تۋىسى ولاردا سىرىڭكە بولماعانىنا سەنىمدى.
“بۇل جينالماعان ءشوپ بولاتىن. ءشوپتىڭ يەسى بىرەۋ تەمەكى تاستاپ جىبەرگەن دەيدى. بىراق ءورتتىڭ سەبەبى ءالى بەلگىسىز”، – دەيدى مارقۇم بالالاردىڭ ءبىرىنىڭ اجەسى التىن ابەنوۆا.
ء“بىز وزەننىڭ جان-جاعىن تەكسەردىك، بۇكىل جەردى اينالىپ وتتىك. پوليتسيا ايماقتى قورشاپ تاستادى. باستاپقىدا ەشنارسە ايتپادى، تەك كەيىنىرەك، ءبىز سۇراق قويا باستاعاندا، ولار بىزگە بولعان جاعدايدى جەتكىزدى. ال بۇعان دەيىن ءبىز بەكەر قاراپ وتىردىق”، – دەيدى قازا تاپقانداردىڭ تۋىسى ارداق ەسبۋسينوۆ.
بالالاردىڭ ولىمىنە قاتىستى ء"ورت قاۋىپسىزدىگى تالاپتارىن بۇزۋ" بابى بويىنشا سوتقا دەيىنگى تەرگەۋ باستالدى. ءتارتىپ ساقشىلارى تۋىستارىنىڭ اشۋىنا نارازىلىق ءبىلدىردى.
“ارينە، قاراڭعى بولعاندىقتان تابىلعان مايىتتەر تۋرالى دەر كەزىندە حابارلاۋ قيىن بولدى. وندا ماماندار، ساراپشىلار مەن تەرگەۋ توبىنىڭ وكىلدەرى جۇمىلدىرىلدى. سوت-مەديتسينالىق ساراپتاما تاعايىندالدى”، – دەيدى اتىراۋ وبلىسىنىڭ پوليتسيا باسقارماسىنىڭ ءباسپاسوز حاتشىسى مەيىرىم ەسداۋلەت.
“ادىرنا” ۇلتتىق پورتالى.
